尖啤獲准上訴到終院 呢勻花生有排食唔完

　　自從前特首CY落咗台之後，佢個「好Buddy」劉夢熊（Dream Bear）都漸轉低調，亦都有可能係因為佢前年單案坐咗十幾個月，上年先放出嚟，所以就修心養性咗一排。不過Jenny今日見到佢又上報啦噃！

 

 

仲記唔記得呢期《陽光時務》可謂掀起全城撲書潮，當日一出Jenny都有搶購啊!

 

與CY老友鬼鬼到勢成水火

 

　　原來今日上訴庭批咗Dream Bear嘅上訴申請，上訴啲咩？之咪就係佢之前意圖妨礙司法公正單案囉！是咁的，當初Dream Bear幫CY助選，搞呢搞路，諗住一人得道，雞犬升天喇！點知到CY貴為特首之時，本身講好畀Dream Bear入行會，同埋推薦佢做下屆政協常委，最後通通都冇履行到。Dream Bear就梗係嬲嬲豬啦，「反轉熊肚」係咁追擊CY，大爆佢啲黑材料出嚟！

 

　　不過喺2013年，Dream Bear捲入咗一單貪污案被ICAC查，佢就以為自己有「後台」，Send咗電郵去大CY，要佢下令ICAC唔好再查佢單案。莫講話本身特首係冇權干涉ICAC查案，就算退一萬步係有權都好啦，以當時CY同Dream Bear關係咁差，CY又點會幫佢吖！結果好好地串謀詐騙及洗黑錢就罪名不成立，但係就係因為呢封電郵，Dream Bear被判坐咗18個月花廳喇！

 

「士可殺，不可辱」？

 

　　其實單案Dream Bear都刑滿出獄，佢都要堅持上訴，斷估係佢覺得「士可殺，不可辱」！佢個定罪上訴許可申請，最初被上訴庭駁回，Dream Bear梗係唔服啦！一於入紙向上訴庭申請證書，要上訴庭證明佢講嘅法律爭議係「涉及重大廣泛重要性」，等佢再向終審法院申請上訴許可。

 

　  唔入又至可，今日上訴庭又真係批咗佢嘅上訴許可通知書，畀佢上訴到終審法院噃！上訴庭話，Dream Bear講嗰幾個法律爭議，又真係涉及重大廣泛重要性嘅！所以Dream Bear可以上訴到終院喇！雖然花廳唔坐都坐咗，但係有機會翻身，都未嘗唔係一件開心事嘅，Dream Bear今日實開心到跳起Yeah喇！至於Jenny就比較期待佢仲會唔會有咩料爆喇！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情