「今時今日咁嘅服務態度未夠㗎」！香港嘅服務業曾幾何時被劉德華呢句說話搞到怨聲載道，個個都呻因為呢句話被啲惡客食住上。不過近幾年小妹就留意到，有唔少細舖頭開始有返自己嘅原則，堅拒惡客！反而就贏到唔少掌聲！而好多大公司就Set咗好多規則，務求保障他人又保障到自己呀嘛！

 丘應樺(左二)同Jenny人情味係冇嘢代替到！

AI阻隔「麻煩友」 真人懂得「照舊」

　　而現時人工智能咁Hit，唔少公司都會用科技解決一啲簡易問題，亦都可以過濾到部分問題多多嘅「麻煩友」，但係咁樣會唔會反而令到多咗服務業人士失業㗎？Jenny今日就去咗香港優質顧客服務協會個記者會，佢哋主席丘應樺就拍晒心口咁同Jenny講，人工智能始終都係取代唔到人對人嘅服務嘅！

　　丘生話，香港人都仲係鍾意直接搵人問，多過透過數碼渠道解決，而且服務業人員比起人工智能有樣好處，就係有人情味！佢就舉例話，好似一個客人去慣茶餐廳飲奶茶小甜多奶，同佢相熟嘅侍應一講「照舊」，嗰位侍應就會知佢落咩Order；但如果用機械人代替，就要逐樣落單喇！點睇呢種人情味都係科技取代唔到嘅！

不斷「按1字」真係人都癲

　　小妹聽完都幾有同感！不過有冇人情味都係其次，Jenny覺得對真人就梗係好過對科技喇！因為真人可以處理一啲複雜同突發狀況，特別係當小妹要打電話問點Set上網Router或者合約問題嗰時，經過無數次「按1字」，聽過無數個機械式Model Answer 之後，都唔知幾時搵到服務員嗰時，Jenny都要吶喊：「搵個真人嚟答我呀呀呀呀呀（無限輪迴）！！！」By the way，如果想服務員用心服務你，記得要自己都要保持禮貌啊！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】常玉作品屢創天價，背後其實藏著跌宕起伏的人生► 即睇