今日係《廣深港高鐵（一地兩檢）條例草案》委員會（即係一地兩檢法案委員會）嘅第一個會議。「一地兩檢」咁有爭議，各位議員就梗係要爭住入去各抒己見啦！所以今次個會有成60個委員，24個非建制議員全部都有加入，而建制就除咗大主席梁君彥、「班長」廖長江、自由黨鍾國斌同埋勞聯潘兆平之外都有加入，雖然唔係全部晒冷，但係人數都仲係多過民主派，民主派想有Say都幾難！

 

　　第一日開會，大家都知第一件事就梗係要選主席喇！Jenny早就收到風，做過保安局局長嘅葉劉，同埋新晉行會成員、民建聯嘅張國鈞想包攬委員會嘅正副主席；而民主派呢邊，身為一地兩檢關注組召集人嘅公民黨陳淑莊(Tanya)當然都希望做主席喇！不過正如Jenny所見，建制派未晒冷都多過你哋民主派，喺呢個不容有失嘅議題上面，佢哋又點會畀機會Tanya吖！

 

建制人馬壯葉劉國鈞齊如願 泛民空手回

 

　　果然不出Jenny所料，葉劉同埋張國鈞如願做到正副主席，Tanya就空手而回。不過，呢個委員會本身最大個爭議就係喺個方案上面，相比之下選唔選主席都唔係最重要，所以大家都好專業咁選完主席就即刻進入開會Mode喇！加上今日個會一司兩局（律政司司長鄭若驊、運輸及房屋局局長陳帆、保安局局長李家超）都在場，民主派梗係留力向鄭若驊發炮喇！唔知係唔係仲係覺得鄭司長係「新仔」，所以帆哥特別「照顧」佢，樣樣嘢都爭住答。

 

帆哥掩護鄭司長 凡事爭住答

 

　　事例一：好似民主黨嘅黃碧雲問鄭司長一地兩檢係咪違反基本法第18條，司長都未嚟得切出聲，帆哥就爭住話：「唔識法律都可以講吓一般人嘅睇法喇！」主動話要回應，碧雲姨就一口拒絕，話呢個係法律問題唔係運輸問題，但係帆哥一於懶理，講埋鄭司長嗰份，唔通帆哥想逗埋司長份人工？

 

　　帆哥係要爭嘢講，激到碧雲姨冇晒符，只能夠等佢講完之後同主席講返應該搵對口官員答。不過帆哥繼續樂此不疲，答人民力量陳志全（慢必）嘅時候，仲將人大常委會同樞密院做比較，話以前樞密院嘅決定會得到尊重云云。Jenny見到慢必聽到O晒咀，追問係唔係即係話人大有咗決定，法院就唔可以接受司法覆核申請呢？帆哥又話「唔係」，真係好難觸摸呀！

 

人大常委會同樞密院比 足以辣㷫Tanya

 

　　帆哥呢個比喻亦都辣㷫埋本身心情麻麻、又係執業大律師嘅Tanya。Tanya喺會後就解釋返香港嘅最終審議權係喺終審法院，所以人大常委會同樞密院兩者係唔同嘅。Tanya仲窒帆哥作為局長，但係對基本法嘅認識咁薄弱，仲要誤導埋公眾，係「非常可笑」呀！

 

　　Jenny就估，帆哥可能都係想貫徹佢「講吓一般人嘅睇法」，覺得就算唔識，講兩句都無傷大雅，又或者佢個靈魂已經「從軀體中出來遊走」咗，唔記得咗自己坐緊喺立法會個會議室到開緊會？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好