2017-06-30
馮煒光Last Day冇「水蓋」 離職後做返「關公」？撞鬼囉！
「關公」今次唔止偏頭痛！皆因被人稱為「白宮發言人」新聞統籌專員(IC)嘅馮煒光喺新一屆政府冇得留低，又冇得拎「水蓋」，但有酬金落袋，仲躊躇滿志決定去做返公關。有政府中人對此只淡然講咗句「好行夾唔送」，而Jenny嘅PR朋友仔一聽佢入返行，反應就大得多，全部個樣變成名畫《吶喊》，有人仲忍唔住衝口而出：「Oh！My God！」，事件發酵數日，一眾「關公」們已經四出索料，仲玩「估公司名」遊戲。
冇勳章又如何？有400萬穩袋？！
今日就係IC馮煒光嘅Last Day，雖然CY冇畀個「水蓋」佢做餞別禮物，但2016/17年度馮生嘅人工連約滿酬金，應該有成383萬元。反而真．白宮發言人、現任白宮新聞秘書斯派塞(Sean Spicer)，年薪只係17.7萬美金、即約138萬港元，係馮煒光嘅三分一左右咋。
馮煒光講明離職後，只做財經公關，按政府要求唔會涉獵政治同公共事務，再寫下專欄過日晨。有PR同Jenny分析，當年馮煒光辭任「靈思公共關係亞洲」嘅董事時，由細佬馮煒航接任，另外好似仲有三成股份喺該公司，可能第時馮煒光新公司係由呢度分支出嚟都唔定。
其實成為IC前，馮煒光喺財經公關界都薄有名氣嘅。佢96年創立「靈思公共關係」之後，再以聯營方式開咗「靈思公共關係亞洲」，客源由地產商至國企都有，可謂不愁衣食。2013年為咗應徵做副局長，辭任上述兩間公司嘅董事，放棄經營17年嘅事業，務求「淨身」入政府，最後失落副局但當上IC，佢真係「執到」啦！
離職操故業 「關公」話作孽
公關行業競爭大，財經公關就更加，專有名詞多，涉及持份者又多，對客人要無微不至、對數字要心思縝密、對記者更要進退得宜。當年，佢同學生講Talk時都曾經提過，做公關要識解決危機、面對傳媒，建立良好的形象。之但係，馮生本人做唔做到呢！過去幾年佢嘅表現大家相信「有目共睹」。馮生鬧出嘅「關公災難」無數，Jenny身邊嘅資深「關公」們每每聽到佢嘅名都搖頭嘆息。
馮生災難「鑊鑊新鮮，鑊鑊甘」。就等Jenny同大家「回帶」啦！首先，不得不提2013年藝發局選舉，由佢旗下公關公司負責，點知出現咗選票釘裝缺頁及多頁嘅低級錯誤，最終馮煒光鞠躬道歉收場，亦係佢最後一次喺公眾面前Say Sorry。之後做咗IC，就更是令人無語。
馮煒光fb呢張與台灣政圈OL嘅合照都曾引發「關公災難」，最後他決定刪除呢張相。
馮生做IC 公關No Eye See
IC原本要識同傳媒、議員打交道嘅，但馮煒光成日鍾意反其道而行，喺Facebook撰文向學者及議員開火、撻著記者都唔係第一次。有次佢仲被發現第一個留言係下午5時09分，即辦公時間玩私人Facebook，所以咪畀人鬧佢不務正業囉！
佔領運動期間，佢將一張警員受傷嘅劇照當現場相片咁上傳Facebook！畀人發現之後，美國時代雜誌(TIME)報道都跟進報道，真係「衝出國際」。
至於馮生幫特首管理Facebook，一樣搞出個大頭佛。話說喺2015年尾時CY無啦啦加咗多名性感台妹做「朋友」，特首辦話帳號係被黑客入侵，不過就被眼利嘅行家發現，其實佢哋喺入侵前已經做咗Friend喇噃……
仲有，佢未取得授權就幫CY個Facebook上載咗條翻唱Beyond名曲《喜歡你》嘅片，馮生咁就又整多劑「關公災難」畀CY！
其實發生咗咁多次Facebook「事故」，馮煒光仲未掌握到點玩Facebook。上年1月時CY被人Add咗入一個不公開群組，做埋管理員添。點知馮生原來唔識點樣移除管理員身份，網民即窒：「不如你畀月薪10萬我，我教你點用FB啦！」。
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇
