《Online有話兒》iPhone 13就出爐，有乜新功能要留意？

　　一年一度嘅蘋果產品發布會預計將會係9月舉行，大家梗係關注新推出嘅｢iPhone 13」會有咩新功能啦！其實市場上已經有唔少人已經作出預測，包括新手機會唔會加大容量、將會有新顏色之類！所以《Online有話兒》今集就同大家盤點一下市場對蘋果手機所預測嘅新功能啦！

 

 

郭明錤：蘋果新機可打衛星電話

 

（Shutterstock圖片）

　　作為蘋果專業分析師，天風證券嘅郭明錤就大膽預測，新一代iPhone 13係4G/5G覆蓋唔到嘅範圍，可以進行衛星通訊！佢解釋，iPhone 13 採用支援衛星通訊的客製化高通 X60 基頻晶片，若蘋果 iPhone 13 提供衛星通訊功能，相信最有可能合作嘅廠商是 Globalstar；而蘋果目前正面臨低軌衛星通訊與 5G（毫米波）網路技術革命，未來手機同Apple Car都有機會整合，為用戶提供創新體驗。

　　不過，話返兩頭，如果真係可以打衛星電話，又應該點收費好呢？但如果有一日你流落荒島，呢部可打衛星電話嘅手機可能救你一命都唔出奇！

 

高階Pro機型或將提供1TB容量

 

（Shutterstock圖片）

　　容量問題一直都係用家考慮入手嘅原因，最初蘋果手機提供8gb、16gb及32gb，一路演化之今，手機鏡頭高階咗，拍片影相質量好咗，所以容量都要大升級！據指呢次高階Pro型號將會提供1TB版本！真係用嚟拍電影都得囉。而尺寸方面都會同上一代相似，尺寸分別為5.4吋、6.1吋和6.7吋。

　　除此之外，更值得期待係鏡頭嘅改版升級、電池壽命延長、更快嘅A系列處理器，以及新嘅5G晶片，而鏡頭有傳將會加入超廣角鏡頭，人像對焦、景深功能。顏色方面，網絡上面傳聞會推出四款新顏色：珍珠玫瑰金、消光黑、日落橘金及珍珠白，而手機背會推出磨砂玻璃面，睇落會有種夢幻感覺！

 

Touch ID將會強勢回歸？

 

（Shutterstock圖片）

　　近呢兩年疫情嚴重，用開蘋果手機Face ID一係要除口罩，一係就要輸入密碼，所以有用戶一路都希望蘋果新手機可以出返Touch ID功能，等用家方便解鎖。之前有傳蘋果放棄Home Button之後，就推出返螢幕指紋解鎖，同三星手機類似。但係大家可能要失望啦！郭明錤就指，根據目前已知嘅零件中，並未留意到有螢幕指紋解鎖嘅感應器或iPad Air Touch ID 嘅按鍵模組，睇怕iPhone 13會出Touch ID 嘅機會不大。

　　另外，市場傳聞指，蘋果手機將會移除Lightning叉電口，你以為蘋果會換上USB-Type C插口？錯啦，有傳蘋果計劃將整個充電口完全移除！其實過往蘋果一路都為無線充電鋪路，等大家慢慢咁習慣使用呢種功能，如果呢一代手機真係「一刀切」的話，唔知大家會唔會習慣無得「邊叉邊用」嘅日子呢？

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情