2021-01-25
《Online有話兒》共和黨人出聲反對彈劾，侵侵或甩難？
新任總統拜登終於正式上台，正所謂「人走茶涼」，侵侵（特朗普）的總統夢雖然變成歷史，但係仲有一大堆手尾要跟，包括遭到對家民主黨嘅第二次彈劾審議。但有消息指，有為數不少嘅共和黨議員表示反彈，唔通侵侵呢次真係可以「功成身退」？
(Shutterstock圖片)
共和黨議員反對，侵侵定罪可能性減低
(Shutterstock圖片)
係本月13日，國會眾議院表決通過針對侵侵嘅彈劾條款，指控佢「煽動叛亂」，令侵侵成為美國史上首位被兩次彈劾嘅總統。參議院宣布將於2月8日開始進行彈劾侵侵議案，如果成功的話，佢將無法再次競選2024年之餘，仲會被剝奪前總統特權。
不過又有小道消息指，有共和黨黨員認為，如果黨員內部都自己「鬼打鬼」，將會進一步加劇黨派分歧，所以有議員認為憲法無權力係侵侵離任後再以彈劾將佢定罪。再加上民主黨想侵侵入到罪，仲要１７個參議院嘅共和黨人倒戈支持先可以成事，呢個數目確實有點難度，所以侵侵被定罪機會大大降低啦！
時代周刊歷年有35個「侵」封面，見證時代變遷
(時代雜誌圖片)
侵侵係熱火人物就係人都知，所以成日都成為周刊報紙嘅封面人物，而美國《時代》創意總監就梳理侵侵曾經上過該雜誌嘅封面，竟然高達35個！回憶起侵侵第一次上時代係1989年，當年佢仲係一個成功地產商，封面題目為：「This man may turn you green with envy- or just turn you off」。手中仲要拎張啤牌，邊個會估到28年後佢會當選總統？
(時代雜誌圖片)
侵侵作為總統候選人而上《時代》，已經係2015年8月，當時大家仲記唔記得佢同希拉里係民調中旗鼓相當呢？當大家都以為希拉里應該坐定粒六可以拎到寶座，侵侵竟然爆冷當選，之後全世界都為住呢個男人而轉；因此侵侵往後已經好少再幫《時代》拍封面，取而代之就係「P圖」或美工圖畫為主。
侵侵：我哋會做啲嘢，只係未開始
(Shutterstock圖片)
侵侵自從卸任後都無咩點講過嘢，加上社交媒體都被人封鎖晒，真係有啲唔慣！不過上周三離開白宮之後，佢就開始打下高爾夫球、去渡下假疏下肝，係前日食緊飯時後被記者問接下來有乜打算，佢終於開腔啦：
「我哋會做啲嘢，只係未開始咁解。」
唔知佢會做啲咩反擊呢？不過去呢次旅行時，佢兩公婆抵達棕櫚灘機場，侵侵就停低畀記者影相，但老婆梅拉尼婭就自己彈開，呢條片係網絡瘋傳，唔通佢兩公婆婚姻真係亮起紅燈？定係2024年捲土重來呢？
撰文：李皆穎
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
第九屆「傳媒轉型大獎」請投etnet經濟通一票！► 立即行動
