特首選舉走入最後直路，剩低唔夠兩星期，我哋一齊嚟睇吓呢場跑馬仔嘅戰況去到咩環境啦！

 

　　各個選手都出盡渾身解數，務求喺最後可以漂亮咁跑出。一號選手曾俊華以一招又一招嘅「Facebook」親和攻勢，成功俘虜不同陣營嘅人嘅支持，但係就俘虜唔到阿爺嘅心；二號選手林鄭其實唔係咁想選（根據佢嘅講法），佢只係想退休，同老公喺英國過寧靜嘅生活，但係因為要喺689 1.0唔撈之後，畀啲人有個機會發洩，所以先戚起眼眉、昂起心頭，參與呢場凡夫俗子先重視嘅遊戲；三號選手胡國興起跑得最早，但跑得最慢，畢竟佢從來都唔係一位政治人，而係一位曾經長期管理政治選舉嘅法官，而好可惜嘅係，一過咗夜晚9點，佢就開始步入睡眠狀態，令大家期待已久嘅辯論失色不少。

 

 

　　相比起5年前嗰場選戰，同埋焦點所在嘅辯論，今年一定係被比下去，一來冇料爆、二來冇花生、三來冇內容，但係睇住兩位前司長點樣互窒對方互相卸責，再借機會拋出金句，都算係一種享受。

 

　　而對於幾個候選人嚟講，呢個冇內容嘅辯論對大家都係最好嘅結局，因為唔會影響本來已經出現分歧嘅民望，亦都唔會動搖阿爺嘅最終決定。三人亦都依循返原本嘅人物性格，鞏固市民對自己嘅睇法，支持嘅更加落力支持，反對嘅更有條件反對。

 

　　內定、好大機會勝選嘅林鄭，一開始有畀到少少笑容，盡奶力營造一種親和感，但冇得扮嘅，好快心入面潛藏嘅官威就散發出嚟，強調自己執行力強，又再出盡火力攻打曾俊華喺財政上嘅無為，但同時好難得地見到佢會「欣賞」敵對陣營嘅優點，佢趁自由辯論環節，公開向曾俊華挖角，話跟隨曾俊華辭職嘅政治助理羅永聰，幫曾俊華做出一個傑出公關，「我當選後可能都會請阿聰入我嘅團隊」。佢嘅過人自信，甚至令佢忘記咗自己都曾經有一位合作一年嘅政治助理。的確，呢種自信係會令佢成為一個「強勢」領袖，但亦都顯示佢唔會信任同佢合作嘅人。喺公開場合唔信任自己嘅公關團隊，佢競選辦嘅職員喺嗰刻情何以堪？ 

 

　　曾俊華當時回應「呢個係錢買唔到嘅團隊」，其實就最反映到佢同現屆政府最突出嘅分野。曾俊華會利用時間，慢慢經營自己嘅民望，同埋佢希望時間可以證明，佢為香港儲嘅儲備，係有遠見先會咁做，而689及其2.0所抱持嘅哲學，就係希望大灑金錢，務求做到立竿見影，個人認為，並無對錯之分，但係喺現時香港呢套行政制度，和和氣氣同快速發展，兩者似乎係水火不容。 

 

　　除咗「你主場你講晒佢啦」，成場最令人印象深刻嘅一句，就係林鄭苦口婆心咁叫曾俊華唔好咁在意民望高與低，「我勸下你啦，民望呢樣嘢呢，就可上可落，我哋見到好多人，選時民望高，甚至上任時民望高，但係好快跌咗落嚟。」回歸以嚟三位特首都係選時民望高，最後民望敗走收場，而上屆梁振英更加典範，當時唔少評論都話佢係挾高民望，以令中央容許佢入閘撼唐。難怪曾俊華立即回贈一句：「你講緊邊個呀？」

 

　　冇錯，林鄭咁講係有道理，所以為咗曾俊華好，其實佢唔當選係最好嘅結果，等大家繼續沉醉喺「曾俊華好好」呢個夢之中，選票輸、但可以名留青史。

 

　　從五年前，豬狼對決辯論嘅「我主場；你呃人」開始，香港人經歷咗好不容易嘅五年，反國教、盲搶地、八三一、雨傘革命、反水貨光復、政改甩蹗、本土崛起、反港獨、魚蛋革命、人大釋法、689不連任變升職，一大班人曾經熱血 沸騰，但一盤盤冷水照頭淋，令全香港都充斥住得過且過，「做啲咩都改變唔到大局」嘅氛圍。今場辯論大家最記得嘅，就係候選人處事態度嘅分野，唔需要有實質內容，只需要金句能夠反映性格，就已經令大家心滿意足。或者呢個，就係北京最想出現嘅一種「民主選舉」。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票