解救過猶太人地球人宇宙公民嘅里安尼遜，喺《救參96小時》入面，智勇雙全，施展渾身解數，救番寶貝女。而我今次「救心96小時」，有好多可一不可再嘅幸運成分，雖然我無信仰，冥冥中好似有主宰。

 

　　試問如果：

 

　　病發早啲，食早餐無耐，手術唔做得，等一等，死梗。

 

　　病發遲啲，按計劃去健身房跑步舉重，跑一跑，死梗。

 

　　老婆唔喺身邊，無人當機立斷去醫院，拖一拖，死梗。

 

　　醫院門診唔係無乜病人，可以即做心電圖檢查，拖兩拖，死梗。

 

　　老婆喺緊張關頭搵唔到同學，肯定去咗公院，重新分流輪候，重新化驗檢查，心臟科醫生未必駐院，手術室未必空檔，等兩等，死梗。

 

　　同學短時間內，搵唔到兩位專家，等兩等，死梗。

 

　　唔係自小運動，底子厚，心臟血管5％流量，都支持咁耐，死梗。

 

　　無經濟能力，無買醫療保險，點敢住私家，用最好支架，留喺ICU觀察，左算右算，死梗。

 

　　四日96個鐘，啱啱遇著剛剛，有險無驚，但唔係個個好似我咁好運。與其等運，不如坐言起行，唔使戒乜戒物，但可以少甜少鹽少油，少肉少煙少酒，多菜多行多跑。有人可能話，咁寡，做人有乜意思，咁就要睇你追求乜啦。我追求快樂，物質又點可能畀到真正快樂，就算我快樂，老婆同埋家人因我而唔快樂，人生根本無意義。

 

　　「無我嘅批准，唔可以瓜。」「知道。」

 

　　「未還晒欠我嘅，唔瓜得。」「知道。」

 

　　「你愛我，唔准早瓜過我。」「知道。」

 

轉載自: 晴報

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票