黎明定已令很多廣告創作、形象包裝、公關公司、宣傳部門班蹺王爆頭，度計如何招架黎明顛覆巨星傳統的連串怪招，親自公開道歉、將演唱會在fb直播、紆尊降貴做小職員賣咖啡廣告，不惜將自己首本名曲《情深說話未曾講》二次創作成《情深咖啡未曾飲》，更親自情深演繹，響響亮亮的向版權條例講「No」，網民當然like爆，廣告放on line播而不是電視播，目標客仔擺明是網民，點擊、評語、畀like，回響直接實際。

　　黎明再出新招，親自叫賣新碟，兌現尾二場演唱會承諾，將話題演唱會出碟，並答應會盡量簽名，牙齒當金使，黎明真的開團叫人落單買碟，事先聲明，因成本問題，有一萬隻定單才會出，否則退錢。又捉正網民心態，話走得快有炒賣價值。他不怕預售不足會很瘀。

　　黎明此舉就如內地流行的眾籌，籌足錢便成事，否則原銀奉還。每張200港元（運費44元另計），結果只兩日預售Blu-ray Disc已有近兩萬張定單，未出碟已是白金唱片，又得咗！其中會捐出20元給兩個慈善機構，威水還做埋慈善。

　　黎明就如靚佬湯在《職業特工隊》忽然撕開巨星面套，放下身段，赤裸裸做個真藝人，黎明狂潮下一浪是甚麼？期待ing。

轉載自: 晴報

【香港好去處】etnet全新頻道盛大推出！全港最齊盛事活動資訊盡在掌握！► 即睇