無線新劇《鐵馬戰車》繼續制服誘惑，鐵騎巡警雄赳赳，加上一對黑超型爆、超酷，片頭曲節拍強勁和漫畫式畫面，添加青春氣息。對白中提及不少交通部的背景資料及交通警的職務，不單是抄牛肉乾那麼簡單，並道出交警的專業、危險性和辛酸，同時提醒司機們小心駕駛，當中加插一眾新紮師弟在更衣室換衫騷肌，有睇頭，軟硬兼施，用娛樂帶出硬料，發揮infotainment作用。

　　黃德斌擔正演杜Sir，外冷內熱，終日冷口冷面，有咁man得咁man，走師奶殺手路線，駕輕就熟。袁偉豪飾的施馬Sir，面懵心精，給人脫胎換骨感覺，此類吊兒郎當、無厘頭、激死人冇命賠角色不易演，拿捏失準，變硬滑稽，不討好反討厭，袁偉豪磨劍多年，雖仍是男二，卻搶鏡。去年他在《萬千星輝頒獎典禮》獲提名飛躍進步男藝員及最受歡迎電視男角色，均告落敗，施馬Sir一角應可帶來更多機會，登上領獎台的路不遠了。 

轉載自: 晴報

【etnet 30周年】多重慶祝活動一浪接一浪，好禮連環賞！ ► 即睇詳情