繼周星馳搭天星小輪，林峯亦快閃殺入旺角港鐵站，巡視宣傳其四月紅館演唱會的廣告牌，與途人近距離接觸，大打親民牌，任由被野生捕獲，selfie、合照都歡迎，全程四萬笑容，五年未坐過港鐵的他，雞手鴨腳買車飛、唔識「嘟」飛入閘，娛樂性豐富，又坐港鐵玩轉金鐘和中環，引起哄動，場面墟冚，娛樂版大事報道，勁收宣傳之效，比起周星馳花七位數免費請市民乘船，更快、靚、正、慳。

　　事後林峯自嘲「大鄉里出城」，又話日後會再玩快閃，搞多些生活化活動，跟大家像街坊一樣。眾所皆知，林峯是富二代，他此舉是要「撇富」，免太過堅離地，否則會與時代脫節，欠地氣，跟觀眾建起一道無形的鴻溝，影響人氣。周潤發去年催谷賀歲片便帶劉嘉玲去坐小巴，大明星竟坐小巴，成為報道焦點，在網民主導的年代，明星不再坐在雲端上，而是要跟fans friend過打band，紅人搭公共交通工具造勢或成潮流。 

轉載自: 晴報

樂本健【年度感謝祭】維柏健及natural Factors全線2件7折► 了解詳情