楊岳橋 特首或投資 Call Put常勝

　

　　今年政界紅人，非人氣爆燈的楊岳橋（AY）莫屬。新春佳節，他贈予iMoney讀者兩句揮春，就是「Call Put常勝」和「好淡通殺」。這兩句說話除了與投資息息相關，AY也有另一種說法，「睇開iMoney的讀者都知道，股市裏面一定要有Call有Put，除此之外，今年香港會遇到一件大事，就係特首選舉。我哋希望香港人，無論Call邊個，抑或Put邊個都能夠成功。」

　

政壇人氣王楊岳橋影相表情豐富，他祝願讀者在投資市場好淡通殺。

　

　　至於另一句「好淡通殺」，用於特首選舉同樣合適，「特首選舉，有人睇好，當然也有人睇淡，有部分候選人好似熱啲，有啲好似冷啲。最後無論邊個當選，我哋都希望可以通殺，能夠令到香港更加美好。希望佢哋（選委）揀嗰個，都係我哋心諗嗰個，香港人都係有部署。」

　

　　今次這兩句揮春，都是AY自家創作，用得Call、Put，相信平日AY都有玩窩輪，他指以前的確有投資，奈何現時忙於政務，無時間做功課，所以近年已較少投資。

　

投資舖位租樓自住

　

　　近日求婚成功的AY，不論人緣抑或桃花運都極佳。他說暫未買樓，現在只是與家人投資舖位，認為樓市仍在較高位置，要視乎情況才決定買樓還是租樓住，「未來兩三年外圍經濟對香港影響大，由其係美國加息問題，都未知會唔會繼續加。如果樓市持續升落去，當然買唔起，但唔肯定樓市未來會穩定還是有所調整，所以要繼續觀察。」

　

　　農曆新年前夕，AY頻頻落區寫揮春，順道和市民拜個早年。善用社交媒體的他，不時發布寫毛筆字的照片，不少網民稱讚他的字體工整，AY聽後謙虛道出寫毛筆字的由來，「我就無跟老師學寫毛筆字，不過細個有跟爸爸學，自從佢過身之後都無乜人教我。現時有機會從政，發現原來街坊鍾意新年寫吓揮春，所以膽粗粗咁去寫。我都唔夠膽講話我寫得靚，比起真係有心學師的人，例如余若薇，我係差十萬八千里。」

　

　　訪問當日，AY行程相當緊密，處理公務外，同日也安排了至少2場的落區寫揮春行程，到底邊些祝福語寫得最多，民心所願？「無論任何階層，他們都好鍾意寫身體健康。有啲鍾意賭博的市民，會寫股旺雙贏、股馬亨通，或者六合（彩）常中等。至於讀大學的年輕人就多數寫（GPA）過三爆四，出來做嘢的打工仔就寫早日脫獨。」親民的AY大部分的揮春字句都會寫，包括「減肥成功」、「食極唔肥」、「瘦過隻豬」等搞鬼的字句，除了一款他未能落筆，就是粗口，「其實寫揮春都係貪個意頭，開開心心。」

　

楊岳橋（AY）

　

Profile

35歲

現職︰執業大律師、現屆立法會議員、公民黨黨魁

‧任多個媒體的專欄作家，如明報「法政隨筆」、am730「810扮工室」等

 

轉載自: 《iMONEY智富雜誌》

• 

• 1
• 2
• 3
• 4
• 5
• 6
• 7
• 8