她們的姑婆屋

　　樓價下調，單身的J望著bank statement恍似若有所思。

　　「我一個人租樓住，生活都過得去；如果我自己一個買樓，萬一失業都無人可以幫手分擔。」除了心靈需要，另一半也是財政後盾，叫人內外都充滿安全感。只是，面對愛情，她經已處於半放棄狀態。

 

　　J不是沒努力過，可惜以往所遇過的男人，有的出軌，有的不思長進，總之沒有半個可以付託終身。縱然如此，J還是頗看得開：「我有一班好姊妹，表面上的確係得我無著落，但其實過得最自在嗰個係我。」

 

　　為了證明不是瞎說，她逐一細數那些姊妹的苦況：「當中有個係做地產，佢大住個肚都要去新樓盤同其他agent搶客，生完個仔之後，佢老公淨係識得理個仔，對住老婆呼呼喝喝，但其實女人至係呢頭家嘅經濟支柱，個男嘅份糧只係夠自己日常用……

 

　　「另一對男方好有家底，而我朋友就一直想入門，所以明知男友三番四次偷食都當睇唔到。終於佢bump大咗個肚，結得成婚，但男家知道呢胎係女之後，即係變臉，搞到佢差啲產前抑鬱！

 

　　「仲有一個，嫁咗畀個性格古古惑惑嘅髮型師，結婚前夕同我呻睇怕遲早離婚，我問佢點解仲要嫁，佢話騎虎難下……the show must go on!」

 

　　香港男人真的如此不濟？當然不是，我相信這些都是個別例子，只是恰巧在一群相熟女人當中發生。碰上感情關係不如意，幾個閨密互相勉勵扶持，讓大家知道「低處未算低」，說起來也是一種止痛劑。

 

　　誰不渴望婚姻美滿到底，但時間會告訴你，任何關係都有惰性。跨得過， 恭喜你：跨不過，也要想想如何走完餘下的路程。

 

　　受樓市影響，她們近來想出「合資買樓」這個積極方案，一方面當作投資，另一方面……將來無論遇上任何事，也有個容身之處互相照應。對於這個決定，J非常贊成：「好多人都覺得情侶、夫妻都未必可以一生一世，但朋友可以；我哋一齊買樓有晒法律文件保障，應該穩陣過一紙婚書。就算往後有其他變數，賣咗層樓平分啲錢就搞掂。」但願一切真如想像般簡單。

 

　　從男人身上找不到安全感，女人才會想到自給自足。可以的話，誰不想當個幸福小女人？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇