《魚缸博客》話說呢個禮拜熱話就係ＮＶＩＤＩＡ創辦人來港接受科大辦發榮譽博士，席間大讚科大幾犀利、香港點樣座ＡＩ城市，夜晚仲走去「愛文生」嘆啤酒、食小炒，唔講以為大家已經大和解，香港可以隨意買到高階顯卡添。　　　事實上，今年因為美國法令問題，高階顯卡４０９０已經禁止入口香港，之後ＮＶＩＤＩＡ出咗張「４０９０Ｄ」，可以避過美國法例出口；不過，４０９０Ｄ其實係閹割版，核心從原本１６３８４個減到１４５９２個、ＳＭ單元也從１２８組變成１１４組，功能上一定差過原本４０９０，但叫做「袋住先」咁解。　　　黃仁勳到港，呢件事係政治上點樣解讀？博客覺得，其實係中美關係釋出善意第一步，黃仁勳作為先頭部隊，係中美、台灣問題上，呢次處理手法都尚算ＯＫ不過不失，亦睇得出內地透過香港呢個窗口表達修復關係。　　　之但係我哋唔可以只看表面，特別係特朗普上台之後，中美關係會唔會更惡劣、晶片出口會更加嚴禁？博客認為，中國市場貢獻大量營利，如果隔硬分割開，只會令企業增長更困難；雖然美國係晶片上先算係大客戶，但做生意嘅嘢，去到最尾其實係無永遠敵人。如果ＮＶＩＤＩＡ真係完全想切割同中國關係，咁又何必搞個４０９０Ｄ去出口？　　　講完一大堆，其實博客想講，有傳拜登政府將在１１月２８日感恩節前公布新一輪對華晶片出口禁令，如果想沽晶片股，呢兩日可能係機會，特別係中芯（００９８１）、華虹（０１３４７），有機會倒頭急跌。食咗呢一水，詳細都要等特朗普上台先可以分析更多，至於黃仁勳來港，博客只可以話算係個好開始啦。　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇