《魚缸博客》根據美國媒體嘅最新估計，共和黨喺眾議院贏咗至少２１８個席位，攞到眾議院嘅控制權，加埋之前攞到嘅參議院控制權，特朗普以及經過佢改造後嘅共和黨真係全面執政喇，未來兩年施政就可以順風順水。有大行話特朗普上任後，可能會幫美國生物科技公司喺內地生產多啲產品，咁樣就可以享有更好嘅成本效益，因此外界普遍認為生物科技領域都算係特朗普受惠板塊，不過相比其他Ｔｒｕｍｐ　ｔｒａｄｅ概念嚟講走勢就唔係咁強。　　　藥明系今年真係吃盡苦頭。拜登喺任內推咗個《生物安全法案》，限制美國公司同特定嘅中國生物科技公司合作，話要保障國民基因數據安全，防止對美國構成國家安全風險云云。１月份相關提案嘅消息一出，藥明系就好似被雷劈咁，藥明生物（０２２６９）從２３年１１月高位５２﹒４５銀，跌到而家１５至１８蚊上下，最低喺８月見過１０﹒１４銀，累跌咗近７１％，就算過去一兩個月錄得強勁反彈，但對於長期持貨嘅股民嚟講，呢艘艇真係唔知坐到幾時。　　　藥明系要重返高峰都係唔容易呀！睇番業績，藥明生物喺２４年嘅上半年業績中話，雖然上半年營業收入同比提升咗１％，但淨利潤同比減少咗三成，毛利率倒退２﹒８個百分點，公司業績差咗同花旗國立法干預關係不大，北美市場仍然佔公司收益超過５８％，最大困擾仍然在於新冠疫情告一段落少咗個金蛋，同埋外匯虧損。至於同系藥明康德（０２３５９）第三季純利按年跌咗１７％到２３億人民幣，輸過預期，美國市場收入貢獻佔比擴大到６４％，可能係未來風險所在，尋求出售最受法案影響嘅藥明生基業務，可能係明智選擇。　　　宜家藥明系最壞的情況係咪過去？無人敢斷言，因為最新消息話特朗普安排幾名對華鷹派人士入閣，包括大家都好熟悉嘅盧比奧，不過生物安全法案牽涉到好多美國製藥企業嘅切身利益，不同利益團體之間嘅交涉都會影響到法案走向。至於從技術上睇，藥明康德喺今日股價５０天線（約４８﹒３７銀）趨勢上即將升穿２５０天線（約４８﹒９７元），形成黃金交叉，預期長線走勢形成上升動力。現時價格相對１０月７日嘅高位（７２﹒４５銀），仲有三成升幅，可吼位入場，止蝕位４７﹒３銀。　　《編者按》本欄搜羅即市傳聞，惟消息未經證實，《經濟通》亦不保證內容之準確性。

想要獨家投資理財Tips？即Like etnet 全新Facebook專頁► 立即讚好