國資委旗下國新投資認購港股通央企紅利ETF首發份額，香江魚缸上日大升逾500點，可惜今日返嚟未能延續升勢，最終低收近百點，重回18300點水平，成交勉強過千億，本周一魚缸曾穿過17800點，國策消息對魚缸利好作用曇花一現？收市再次失守20天線，如再失10天線，弱勢短時間難以扭轉，可能要進一步下試18000搵支持？不過下周將迎嚟半年結，屆時會有粉飾櫥窗嘅動作出現嗎？
　　據報中證國新港股通央企紅利ETF，首三大持股分別為中海油(00883)、中石油(00857)及神華(01088)，呢啲股份受惠政策利好，加上有中特估概念，大市目前無乜方向下，跟隨國策揀股會較穩陣？惟當中大部分已累積一定升幅，邊隻仲有值博空間？
　　莎莎國際(00178)全年度多賺2.8倍，恢復派末期息5港仙，今次份業績算係有驚喜？不過睇返第一季數據，總營業額按年下跌逾9巴仙，當中港澳地區營業額按年跌近兩成二，表現遠差過神州及東南亞，管理層指北上消費成為常態，反映本地零售業今年仍面對挑戰？
　　聽日(21日)搵嚟iFAST Global Markets投資總監溫鋼城，同大家分析上述股份、大市走勢，當然唔少得分析其他焦點股份！歡迎大家提問投資及其他股票問題。記得準時8:55am，昅實《經濟通》NewsTV直播節目--喇！或者click入嚟https://www.youtube.com/channel/UCmMV_kEiVCf8Mgsep0Ncfqw　打個卡先又得！

獨家優惠【etnet x 環球海產】用戶專享全場95折，特價貨品更可折上折。立即使用優惠代碼【ETN1WWS】，選購五星級酒店級海鮮► 立即瀏覽