《小傳日記》東方甄選（０１７９７）過去呢個幾月送走咗董宇輝，以為終於可以同是非紛擾講再見，點知最近仲惹埋官非，臨到中秋前都過唔到安樂日子。　　最近重慶新晉白酒品牌江小白對東方甄選母公司東方優選提一宗民事起訴，原告江小白控告東方優選有關「不正當競爭糾紛」，１１月１９號喺重慶市第一中級人民法院開審。　　原來事發正正係上個月初「與輝分手」後無耐，東方甄選直系主播天權喺帶貨其他白酒品牌嗰陣就點名提到江小白，話江小白的包裝上無「白酒」兩個字，因為佢唔係固態蒸餾，唔算係固態發酵酒，所以就唔准自稱「白酒」。　　呢次事件同香江呢邊嘅農夫山泉（０９６３３）對消委會嗰次都算異曲同工，原本以為被講幾句唔會有咩影響，但即使之後消委會跪低，農夫山泉股價至今都未見底，就知幾句嘅影響性真係非同小可。所以江小白方面都唔坐以待斃，即時發聲明表明旗下所有白酒產品都係固態蒸餾，而且有國家認證嘅產品執行標準，係純以水同高粱釀造，並無添加任何釀造酒精。江小白批評天權嚴重背離事實，要求東方甄選公開道歉，更一早講明保留法律追究權利。　　隨後天權喺個人微博「講咗幾句」，提到講錯嘢的確係佢嘅責任，表示「非常抱歉」之餘，更加擦鞋改口讚江小白推動白酒年輕化，有機會都願意直播推薦江小白。而之後東方甄選官方微博都轉發咗「呢幾句」，更加由官方出面再次向江小白「表示誠摯的歉意」。原本以為可以「網絡事網絡了」，但江小白隨後再發聲明，表明唔接受呢種非正式嘅道歉，如果輕易接受「１８０度轉彎嘅喜愛同推薦，會令品牌公信力進一步受損，所以都係選擇去告東方甄選。　　老實講，最初江小白只係要求「公開道歉」而唔係「正式道歉」，微博都算係公眾場合，天權同東方甄選都有公開道歉，只係江小白後來先要求正式道歉。不過都無辦法，事實上係天權無啦啦攻擊人哋品牌在先，目前只係告「不正當競爭糾紛」，實際上已經有誹謗成份，道理確實係喺江小白度，不過照佢要求公開道歉咗都照提告，睇嚟江小白都係想搞大佢。　　而天權亦都唔係第一次開口夾著脷，曾經試過串觀眾買唔起３９﹒８人仔一盒嘅蛋黃酥，得罪米飯班主之後被停播三個月。事實反映東方甄選無咗董宇輝之後嘅主播質素再次面臨考驗，今又再出現公關災難，而至今都只係東方甄選同天權道歉，道歉宗主俞敏洪都未出場，而家律師信都收埋，係咪真係要俞敏洪第Ｎ次公開道歉，江小白先肯收手？請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【與拍賣官看藝術】常玉作品屢創天價，背後其實藏著跌宕起伏的人生► 即睇