05/06/2024 16:31
《小傳日記》港人有本土偏好?點解咁多人北上消費?原是利之所在
《小傳日記》今日,滙豐(00005)首度發布《富裕投資者簡報》,顯示本港富裕投資者嘅投資組合當中有三分之一為現金。當中39%受訪者表示將喺未來一年重整投資組合,並打算將逾半手持現金用作投資。另外,高達53%本地受訪者表示,現時有投資本地股票。儘管美股自去年至今表現強勁,但只有三分一受訪者有投資美股,反映普遍香港富裕投資者仍存在「本土偏好」(home bias)。然而,他們對投資其他市場嘅態度逐漸開放,當中有逾4成計劃增加香港以外市場嘅投資,當中又以內地、美國及英國最受歡迎。 對於呢種所謂嘅「本土偏好」,筆者有少少保留。喺自由市場經濟嘅大環境下,邊度有著數,邊度就係投資者偏好所在,理得你本土定係海外。唔信?自從舊年通關後,港人搏命北上消費,仲有咩「本土偏好」?如果唔係貪上面消費水平低、買嘢食嘢性價比高,扣除來回車錢、時間消耗都仲有著數,邊會有咁多人北上?唔通呢個時候又改口話「北上偏好」?查實北上消費一向都係港人嘅情意結,早在上世紀九十年至疫情前歷久不衰。只係疫情後,由於持續幾年被困特區動彈不得,所以復常後北上消費成為一個大趨勢。 不過,以往北上主要以服務消費為主,如按摩、短途旅遊,就算買嘢都係以內地土特產為主。當然亦有人北上飲湯,甚至揾「新何太」嗰啲另類目的啦,所以又有所謂嘅二奶村。但發展到而家,北上消費隨時買到成屋傢俬電器,細至芝麻綠豆都喺上面買返來,無他嘅,慳得就慳。不過,上文講緊嘅係「富裕投資者」,唔通佢哋真係有「本土偏好」而唔北上消費?咁又未必,聽講深圳高檔高爾夫球場同高級餐廳都有好多香港老闆嘅身影。 普通市民消費講究一個字「慳」,但有錢人投資就睇兩個字「回報」。以股市來講,外圍主要股市包括美股今年屢創新高,港股都未返番金融海嘯前水平,吸引力相對大啲。至於投資買樓,港人買本地樓收租,除咗因為樓價下調之外,不外乎方便收租同管理,買賣手續又簡單容易,更重要係稅率低。其實早幾年,當香港樓價居高不下時,都有唔少港人買內地樓、日本樓,甚至買英國樓同澳洲樓都唔係新鮮事。所以話,只要有潛在利益,港人的資金就會跟住去,所謂「本土偏好」,不過係利之所在,並唔係對本土有乜嘢情意結。請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票