《小傳日記》「再不努力，就只能開ＢＢＡ（平治、寶馬、奧迪）！」近日蔚來（０９８６６）發布旗艦轎車ＥＴ９後，哩句金句又被神州網友攞出嚟貼堂。事關ＥＴ９賣價直接標到７８﹒８萬人仔，首發限定版仲要再貴多３萬人仔，有網友直言８０萬人仔駛乜買國產電車，夠買平治Ｓ系列或者寶馬７啦。　　　蔚來ＥＴ９定位高端行政級豪車，對標嘅就係平治Ｓ級、寶馬７系同奧迪Ａ８，但事實上ＥＴ９嘅價錢比佢哋都仲要貴，奧迪Ａ８入門款５０幾萬人仔，寶馬７系６０幾萬人仔，而平治Ｓ級嘅售價都壓到７０幾萬人仔。ＥＴ９出價相當進取，基本上係直接踩喺佢哋頭頂，向世界宣布自己比豪車更豪。　　　豪唔豪就唔係單靠自己講嘅，為咗證明自己係豪車，蔚來喺發布會上搞咗一場減速帶測試，將ＥＴ９同邁巴赫Ｓ級擺埋一齊比拼。畫面入面，ＥＴ９過減速帶好似行平路咁，而邁巴赫Ｓ就搖頭晃腦，其實呢啲「實測」片段，唔少神州公司都做過，當中可以「操作」嘅部分唔少，有唔少人篤爆，蔚來測試用嘅減速帶係專門為ＥＴ９嘅軸距設計。而邁巴赫Ｓ嘅軸距比ＥＴ９長咗１５公分，咁樣比未免有啲唔公道。　　　講真，國產車要挑戰ＢＢＡ，最難嘅唔係造唔到好車，而係點樣撼動ＢＢＡ喺消費者心目中嗰種「高級同豪華」嘅形象。ＢＢＡ幾十年嘅品牌沉澱，已經等於身份、地位同面子嘅象徵，大家買ＢＢＡ唔淨係為咗隻車，而係為咗背後嗰種「有排面」嘅感覺，尤其是出到外國，有幾多人認得出蔚來嘅車標？舉個唔太貼切嘅比喻，名牌手袋縱使用料再靚，現代工藝之下嘅成本價有幾多大家心知肚明，但只要放個ｌｏｇｏ上去售價就可以翻個兩番。　　　而蔚來作為一個新品牌，雖然呢幾年靠換電模式同社群營銷攞咗唔少年輕人嘅心，差在品牌成立時間較短，冇嗰種「ｏｌｄ　ｍｏｎｅｙ」嘅氣質，無論係品牌調性同知名度上都難以同ＢＢＡ比較。蔚來要打造高端汽車嘅定位，就要不斷提升品牌形象和知名度，但從今年第三季度蔚來嘅財報睇出，蔚來為咗維持品牌形象同市場推廣，燒咗唔少錢，導致虧損壓力越嚟越大。　　　再講返蔚來嘅核心用戶年齡較為年輕，主力車型ＥＴ５同ＥＳ６嘅車主平均年齡得廿幾歲，但當ＥＴ９呢個７８﹒８萬人仔嘅天價出現嘅時候，年輕車主多數都負擔唔起，老人家偏保守傾向用番老牌子，蔚來想喺呢個價位搵增量就相當困難。簡單啲講，ＥＴ９嘅目標用戶喺邊，係一個大問題。　　　雖然李斌話首批９９９台ＥＴ９已經搶購一空，但呢啲數字唔代表太多嘢，真實嘅市場反應，仲要睇上牌量同長期銷量。長線而言，新能源車市場競爭激烈，特斯拉、小鵬（０９８６８）、理想（０２０１５）、比亞迪（０１２１１）對豪車市場都虎視眈眈，蔚來要突圍，真係難上加難，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票