29/05/2024 11:56
《魚缸博客》博大市準備反彈,京東牛一前後再博上138銀!
《魚缸博客》魚缸高見19700之後就係咁回,近期落到18500就開始有啲支持,孖屐中人都開始虎視眈眈博反彈,既然要博反彈就不妨吼吓藍籌,博客今日就睇中京東(09618)。 今年5月中各大電商就已經開始618促銷,傳統上618其實係由京東發起嘅周年慶祝促銷活動,但京東做特價,其餘淘寶、拼多多、唯品會都唔會唔做,結果就變成全線電商股都為京東生日開促銷party慶祝。 京東作為618主角,今年派優惠都唔手軟,CEO許冉就話今年會喺價格產品服務上出力,務求要快靚正,5月31號晚8點起將會推出過百億補貼、「兩蚊包郵」等等活動。佢又提到,目前公司已經投入1300億人仔,用於技術研發,而且近期下沉市場轉趨活躍,農村地區成交額大幅上升。 之前高盛針對京東發表研究報告,提到第一季成績好過預期,比預期再多23%。最新將京東目標價由145銀升到161銀。股價走勢方面,京東今個月最高見過138﹒8銀,之後跟隨大市回落,已經落到去250天線附近,如果想博大市反彈其實都係差唔多位,現價可以考慮,有機會落到110銀或以下就更抵買,上返上一個頂138銀都有大約兩成半升幅,短炒呢一浸都值博。 《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票