《小傳日記》神州零售恰如一潭死水，臨近８月期中考放榜，醜婦終需見家翁，好多零售股都無可避免要揭開遮醜布。　　九毛九（０９９２２）最新發盈警，預計今年上半年收入微升６％多啲，大約３０﹒６億銀（人仔．下同），但純利就得嗰６７００萬銀，比上年少賺最多七成！九毛九解釋，大跌原因主要係高基數效應，同時少咗政府補助，而消費者習慣改咗就令到餐廳顧客人均消費及翻檯率都跌咗，而成本控制措施嘅成效亦未及反映喺上半年表現入面，所以造成少賺七成嘅慘況。　　雖然孖屐早就知道神州零售市道唔好，但九毛九今日跌足一成，就證明市道實際情況可能比預期更差。唔止係九毛九，「茶飲第一股」奈雪（０２１５０）上個禮拜都公布咗第二季營運狀況。季內奈雪直營門店數量零增加，計及新開同關閉數目後直營門店數量維持１５９８間。以往茶飲股通常都係鬥開得多間，鬥擴張得快，但奈雪上季完全暫停擴張，證明真係唔睇好後市。奈雪都提到，第二季內「仍未看到需求顯著恢復」，預計今年全年新開直營門店數目會少過上年，希望關閉部分表現唔好直營門店可以提升剩低嘅表現。　　以奈雪嘅講法，其實即係第二季市道未恢復，唔敢貿然擴張，之後唯有食住老本先，再等個市好轉。睇到上面呢兩隻餐飲股明顯就係捱緊嘅階段，除咗慳皮之外已經唔敢輕舉妄動。以往唔係無試過有人逆市擴張，海底撈（０６８６２）當年就係咁，但結果人流不似預期，最終仲要用「啄木鳥計劃」嚟收拾自己嘅爛攤子，如今仲係餐飲業嘅前車可鑒，難怪餐飲股睇唔清後市就索性一動不如一靜。　　美國今季尾先可能開始第一次減息，睇怕下半年神州市道都好難即時好轉，餐飲股嘅春天今年內可能都依然係凍過水，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

樂本健【雙11感謝祭】雙重優惠、多買多賞► 了解詳情