08/07/2024 11:31
《魚缸博客》快手要買快手?大行唱淡要避忌,可以先入第一注
《魚缸博客》快手(01024)喺7月6號嘅2024世界人工智慧大會期間,舉辦以「新AI.新應用.新生態」為主題嘅大模型論壇,同業內專家一齊探討大模型領域發布趨勢,同時面向行業發布視頻大模型可靈 AI、文生圖大模型可圖最新動態。 快手喺大模型技術同應用創新上持續突破,重磅打造快意、可靈、可圖快手大模型家族,仲將生成式人工智慧同快手豐富嘅業務場景、業務形態進行深度結合,致力於為用戶提供更領先、智慧、高效嘅AI體驗。其中,喺視聽藝術同前沿科技交匯點嘅AIGC微短劇,已經取得實質進展同階段性成果。 發展形勢看似一片大好,但快手股價自5月高位63﹒35銀附近持續下跌,至上周五(5日)低見43﹒50銀,短短兩個月股價唔見咗20銀,跌幅超過三成。以一隻市值約2千億嘅科技股來講,真係有啲跌過籠。所謂屋漏兼逢連夜雨,股價已經跌足兩個月,點知幾間大行仲驚佢死唔去,齊齊伸多一腳,下調快手目標價超過一成。 不過,快手股價今日逆市上升,最高曾升近3﹒5%至46﹒2銀。該股4月喺低位44銀附近開始一波大反彈,不足一個月內累積升超過四成。近日喺43﹒5銀同4月低位形成一個小雙底格局。係唔係可以借鑒上次經驗,又來炒一波?從技術層面上睇,的確博得過。不過,要留意4月嗰次大市飆升,主要係受到內地與香港資本市場合作政策影響。 近日大市氣氛轉差,就算快手股價可以再次反彈,都唔好奢望好似上次咁彈得咁高。另外,幾間大行調低目標價,最低嘅中銀國際更只俾60元。多間大行同時唱淡,情況唔可以忽視,因此,唔排除股價仍有上落。穩陣型投資者可以先觀望,進取投資者可以考慮先喺45元落一注,待股價整固後,再落第二注,目標價58﹒5元,41元止蝕。(vs) 《編者按》本欄搜羅即市傳聞,惟消息未經證實,《經濟通》亦不保證內容之準確性。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情