《魚缸博客》市況呆呆滯滯，雖然隔晚美股嗰邊比較波動，但魚缸方面有阿爺買斷式逆回購新招放水加持，帶動今日（１日）都有啲回升力度。博客今日本就想睇吓隻第四範式（０６６８２）。　　博客之所以留意到就係呢隻ＡＩ股噚日忽然大升咗兩成半，近期ＡＩ都已經唔係熱炒時期，隻百度（０９８８８）同商湯（０００２０）表現都無乜好睇，但第四範式竟然成為悶市奇葩，大升兩成半兼成交１１﹒５億銀，真係相當唔惹少。　　升得無聲無息都唔係無原因，因為近期其實都主要係北水炒為主，自從股９月份完成Ｈ股全流通，就一路開始吸引北水關注，到前日為止已經獲北水持有４６５１萬股，佔已發行股數成１７％有多。到噚日大升之後，第四範式全日更加打入港股通（滬）十大成交之列，全日淨流入近１﹒６８億銀，北水就淨買入５３７８萬元。　　睇返點解忽然獲得北水寵愛，主要因為近期無乜好炒，有人就發現其實隻第四範式中期收入規模仲高過商湯，第四範式中期收入１８﹒６７億人仔，反而商湯就得１７﹒４０億人仔，身為科指股竟然仲少過隻二線股，所以就引來北水嘅炒作。　　第四範式核心業務「先知」ＡＩ平台上半年收入１２﹒５１億人仔，佔公司收入超過６７％。「先知」以提升企業核心競爭力為目標，在支持接入企業各類模態數據的基礎上，提供大模型訓練等等服務，喺學術翻譯、健康管理、水電管理、水利、３Ｄ輔助設計、供應鏈等方面都用得到。　　就咁睇其實應用層面廣泛，而且收入方面勁過之前係威係勢嘅商湯，比起商湯感覺商業化進程更加快，的確係吸引。但價位嚟講自今年７月以來就一直受制於５０天線，５０天線更加成為呢三個月嘅下降軌，要買不如等佢企穩５０天線先，咁就真係有轉勢跡象喇！　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】以伊衝突升級，北韓派兵增援俄羅斯，你會否擔心世界發生大規模戰爭？► 立即投票