28/08/2024 12:15
《魚缸博客》小鵬出新車又新晶片,短線有望炒上35銀!
《魚缸博客》市道唔好各行各業都要爭餅食,前有電動車互毆,後有電商開片,行業競爭遍及各行各業。咁嘅環境下,真係唯有自強不息。噚晚小鵬(09868)就舉行咗十周年大會,同時發布新車兼新晶片,正正係反映就算捱沽,都可以努力畀人睇。 小鵬發布新系列Mona第一架車款M03,事前已經知係主打低價市場,所以新車外型係轎跑類型,符合返年青市場嘅眼光。何小鵬介紹,M03花四年時間研發,投入40億人幣,對標20萬級車款;但標價都非常「年青市場」,三款車型最平嘅515長續航版只要11﹒98萬人仔,620超長續航版12﹒98萬人仔,580超長續航Max版15﹒58萬人仔,全系列都大大低於20萬人仔,面對價格競爭絕對有優勢。 何小鵬就豪言,未來十年中國汽車主流品牌或者只會剩低七間,「隨著AI大模型時代的到來,未來十年年銷100萬輛將成為AI汽車決賽入場券」。佢仲提到,經過過去十年喺智能化上嘅堅持後,如今「小鵬汽車」已經正式升級為「小鵬AI汽車公司」,華麗轉身變成AI概念股。都難怪何小鵬咁風騷,噚晚除咗發布新車,仲宣布埋自研嘅圖靈晶片流片成功,話係全球第一粒可以同時應用喺AI汽車、AI機器人、飛行車上嘅AI晶片咁話。 又新車又新晶片,係大餅定真好景,就起碼要睇M03實際賣成點。但講得咁好聽,「市夢率」點都有啲提升,今朝計埋小鵬已經連升第三日,如果今日收穩現價水平附近就正式重上百天線,大市後市受炒減息支持,百天線有望守穩,短線後續再挑戰35銀一啲都唔難。如果M03賣得好,要破埋35銀都大有機會! 《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票