《魚缸博客》早幾日有聽博客講分階段入小米（０１８１０），相信今日大家去飲茶都有叫多隻灌湯餃食啦！今次就輪到金山雲（０３８９６），升三成幾仲有十幾億成交，真係嚇親人咩！　　　雷軍魅力果然犀利，原來金山雲炒起，主要係有消息，小米正在搭建自己的ＧＰＵ萬卡集群，並且該計劃已實施數月，小米將大力投入ＡＩ大模型領域，團隊成立時已經有６５００張ＧＰＵ資源。　　　可能大家唔明佢叻係邊，佢叻嘅地方在於可以買到６５００張顯示卡，可以起到大型模組。當中國仲被美國封鎖期間，小米系企業似乎靜靜咁自己做，佢手機晶片又可以搵高通做，大語言模型「ＭｉＬＭ」又買到顯卡，造車「ＳＵ７」又長期位居銷售榜，博客覺得佢可能繼華為之後，又一間「遙遙領先」嘅企業。　　　金山雲同小米結合會變成點？博客即時聯想到：ＡＩ智能家居。小米從車、電話、電器都有出品，就好似電影咁，坐係ＳＵ７上叫一句「小愛同學」：幫我開定冷氣、開熱水爐、搵定今晚節目，順便幫我電話落個外賣，曾經蘋果都想做家居智能，不過唔知點解做做下無消息。但肯定係，呢個會係小米想走嘅其中一個方向，而呢個方向潛力極大。　　　博客認為，金山雲已經破歷史新高，應該開始進入瘋狂炒作期，要當佢係一隻未來科技ＡＩ股去看待佢估值，１０蚊？２０蚊？博客唔識講，睇你認為雷軍個人魅力值幾多錢，從來炒科技股都係炒個人魅力，蘋果以前有Ｓｔｅｖｅ　Ｊｏｂｓ、特斯拉有Ｅｌｏｎ　Ｍｕｓｋ、微軟有Ｂｉｌｌ　Ｇａｔｅｓ，而小米要炒作嘅，就係雷軍。　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票