《小傳日記》中央喺９月底連環出重拳扶持樓市，刺激經濟，中港股市絕地反擊，接連爆升。當中Ａ股９月３０日更創下１６年來最大單日升幅，同日港股成交金額更創下歷史新高。手頭有貨嘅投資者自然笑呵呵，有內地股民更揚言要Ａ股（上證綜合指數）見萬點。上證指數周一（９月３０日）收報３３３６點。對於呢一波股市大爆升，有內地網友戲稱係「武則天守寡－－失去李治（理智）」。聽落好笑之餘，又未嘗沒有道理。　　以港股為例，自９月２４日人行宣布降準及推出一系列扶持樓市及刺激經濟措施以來，恒指由９月２３日收市１８２４７升至今日最高２２６６７，短短６個交易日，累升２４﹒２％。升幅驚人。個股方面，升幅更誇張，以龍頭科技股美團（０３６９０）為例，９月２３日收市至今日最高價計，累升５１﹒７％。而同期京東集團（０９６１８）升幅更高達７０％。個別細價股升幅更以倍計，以佳兆業集團（０１６３８）為例，期內升幅高達４﹒７１倍，禹州集團（０１６２８）期內亦升２﹒１６倍，而呷哺呷哺（００５２０）期內也升１﹒３８倍。　　無論係Ａ股定係港股，９月尾以來嘅升幅之巨都令人意外。早前有內地網絡小說作家聲稱，幾日內喺Ａ股市場豪賺３００萬人仔，仲話要即時中斷小說更新。呢件事係真係假無人知，難以下判斷。但除咗長期投資者因為手上持倉升值而賺大錢之外，究竟有幾個人撞啱近期入市而一夜暴富？今年６月２７日，環球時報前總編輯胡錫進喺微博發文分享過去一年投資成果同心路歷程時，都聲稱自己都被「割韭菜」。而近幾個月來，當上證指數接連跌穿２９００、２８００、２７００等多個心理關口時，好多散戶都心灰意冷，有人更誓言旦旦，話以後唔再碰Ａ股了。可是言猶在耳，中港兩地股市卻突然報復式上升。有幾多心灰意冷嘅散戶，即時改變負面情緒，及時重投Ａ股懷抱，趕搭呢趟超高速升市列車？呢樣嘢就難講！畢竟中港股市從９月２４日開始爆升時，極少數人預知呢一波升浪咁震撼。　　Ａ股積弱多時，港股呢幾年同樣跑輸外圍股市！突然喺政策推動下爆升，相信除咗散戶措手不及外，外資同樣睇到眼紅。不過呢種政策推動嘅爆升，世間少見，恨唔來嘅。　　至於股市連升咁多日，而家再入市仲有無肉食，定係會被「割韭菜」？有媒體報道，９月２３日至２７日，當Ａ股反彈至３０００點之際，有５０家上市公司高管或股東公告減持１０８次，合計減持股數為１﹒５２億股。由於外來資金大量湧入，即使真係有大股東減持，股市照樣狂升，而大股東減持嘅消息亦完全被掩蓋，難怪有人話呢種係「武則天守寡」式嘅升市。隨著港股Ａ股化，呢種情況恐怕陸續有來，至於會唔會被割韭菜，睇彩數之餘，股民都應要學習下價值投資，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票