《小傳日記》魚缸今朝受累減息預期大跌而低開，隨後意外有啲回升力度，反映都仲算係觀望期而唔係悲觀期。而魚缸今日都有搵嘢炒吓，今日就開中ＡＩ同量子概念。　　　今朝《路透》報話蘋果近期正係同ＱＱ（００７００）同字節跳動傾緊將兩公司嘅ＡＩ整合到內地版ｉＰｈｏｎｅ，但係討論仍然非常早期，係咪成真都未知。但ＱＱ股價未出發先興奮，晏晝起倒升最多３％報喜。而孖屐最關注嘅係蘋果明明同百度（０９８８８）傾開，仲以為文心一言會成為神州ＡＩ大模型嘅贏家添，點解蘋果決定半路轉舵呢？　　　之前外媒就報道，其中一個分歧係蘋果嘅私隱政策唔允許收集使用ＡＩ功能嘅用戶數據，但百度就希望可以保留並且分析呢一部分數據。呢篇報道今個月初推出，到今日就傳蘋果已經快人一步接洽ＱＱ同抖音。亦難怪百度對用戶數據嘅渴望，百度文心一言上線就快一年，呢年來都無乜再有消息流出，假如表現真係咁好百度應該搶著公布，但似乎蘿蔔快跑嘅曝光率仲高過文心，就知文心成績曳曳哋。ＡＩ大模型最需要學習，無人用嘅話基本上學習都慢得多，百度要收集用戶數據明顯就係想為文心提供更多素材，學李彥宏話齋，神州同胞願意用隱私換便利，但蘋果呢啲外國大廠就唔係咁諗，用戶私隱又點可以隨便轉交呢。　　　至今三間涉事公司都無正式回應，即係有傾都未算落實，但蘋果咁樣扭一扭，即刻攞返個主動權，話畀百度聽而家係我揀你唔係你揀我。而百度到口嘅肥豬肉跌返出嚟，股價都即時反映要跌４％。實際上百度跌跌不休，嚟香江上市以來基本上係無升過，但如果而家無咗蘋果呢條救命稻草，可能好快就會失去國內ＡＩ龍頭嘅地位。　　　事實證明ＡＩ行業真係不進則退，兩大龍頭百度同商湯（０００２０）過去一年都無乜作為，逐漸就被後上嘅同行趕上，假如百度唔能夠開花結「果」，之後就惟有靠無人駕駛方面食糊，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇