《小傳日記》美團（０３６９０）股價今日最多升近４％，升幅冠絕ＡＪＭＴ四大科技股。股價之所以升咁多，莫非真係炒緊「低空經濟」？美團無人機業務「ＫｅｅｔａＤｒｏｎｅ」正式喺杜拜啟動。目前產研團隊和業務條線均有一定規模，Ｋｅｅｔａ　Ｄｒｏｎｅ初期嘅營運狀態類似於第三方物流，即與一些餐飲連鎖企業達成合作，承接其在杜拜特定區域內嘅配送服務。Ｋｅｅｔａ　Ｄｒｏｎｅ仲同當地醫院洽談緊，後續將拓展藥品配送等醫藥場景，逐漸將餐飲、生鮮及藥品等品類都接入供給。　　　進軍海外似乎成為一股潮流，亦難怪嘅，內地市場近年「內捲」嚴重，加上消費降級，要維持以前高速增長確實唔容易。不過，海外市場雖然龐大，但照搬內地模式往往撞板，各地經營模式、企業文化、社會習俗、法律及稅制等都存在差異，更難解決嘅可能是保護主義，因此進軍海外存在重大變數，前景真係見仁見智，就好似拼多多係眾多電商中首先出海嘅一批，雖然Ｔｅｍｕ已經名聲在外，但目前發展都並非一帆風順。　　　泰國係繼菲律賓和馬來西亞之後，Ｔｅｍｕ進入東南亞市場嘅第三個國家。不過，Ｔｅｍｕ喺泰國上線無耐就遭到調查。泰國總理貝東丹早前下令，調查Ｔｅｍｕ有無遵守泰國法律，及繳納所需稅款，仲要警告任何幫助外國平台商逃稅嘅泰國官員，都將受到嚴厲懲罰。據報，調查工作將由政府跨部門聯同警方執行。此外，泰國政府直指，外國平台商資金雄厚，配備新技術，使得泰國企業難以競爭。據報Ｔｅｍｕ第三季度ＧＭＶ增速正在放緩。　　　除咗泰國，拼多多喺越南嘅情況都唔好得去邊。Ｔｅｍｕ喺越南上線無耐，越南政府官員曾公開點名Ｔｅｍｕ嘅稅務問題，並指示越南稅務總局立即對Ｔｅｍｕ進行檢查並準備稅務記錄。越南工貿部副部長阮黃龍強調，如果Ｔｅｍｕ、Ｓｈｅｉｎ等電商沒有遵守規定，工貿部將聯合相關部門採取技術手段，比如封鎖應用程序和域名。據報如今Ｔｅｍｕ越南業務已被暫停。禍不單行，Ｔｅｍｕ喺印尼同樣遭到封禁，當地要求平台下架Ｔｅｍｕ。　　　內地電商平台盛行嘅代價就係線下經濟頹敗，帶貨主播一哥一姐帶嚟銷售量贏百貨公司幾條街，足以打翻批發零售鏈條上千萬打工仔嘅飯碗；與此同時規模化生產嘅神州低價小商品殺到他國市場，對當地中小企亦會構成重大威脅；而對於他國政府嚟講，如何向呢啲跨國互聯網平台徵稅亦係一大挑戰。　　　杜拜嘅保護主義未必咁明顯，困難或者會少啲。但成個阿聯酋人口得９００幾萬，同印尼市場２﹒８億人口相差十萬九千里。而今次美團進軍嘅市場係杜拜，人口雖然有３００幾萬人，但當中有８５％係外勞，主要來自印度，巴基斯坦，孟加拉。佢哋主要參與基建，或提供服務如酒店等，一般有僱主提供集體膳食。而本土人口少，只得１５％（約５０幾萬人），少過新界沙田區人口。本地人雖然相對有錢，但唔知有幾多人會幫襯無人機送餐飲？就算叫外賣餐飲，喺沙漠地區夏天經常四十幾度高溫的情況下，唔知到時凍飲會唔會變熱飲？或者你話送餐包裝具保溫功能，但都要成本㗎。今次進軍杜拜可能只是一個姿態多於實際，或者為進軍成個中東做示範，嚟緊要花嘅時間同金錢唔會少。所以，投資者唔好咁興奮住，中東市場係寶定係草，暫時仲係言之過早。請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票