《小傳日記》自從特朗普當選美國新一任美國總統後，市場已經提高警惕，事關特朗普呢把「神經刀」，隨時想劈邊個就劈邊個，買股票之前可能都要諗過度過，盡量避開一啲風險大、容易受打壓嘅股票，例如外貿相關股。而家距離特朗普上台唔夠兩星期，正當大家以為仲可以享受片刻寧靜之時。點知美國國防部周一（６日）將包括騰訊控股（００７００）同寧德時代（深：３００７５０）在內嘅多間中國科技巨頭，列入同中國軍方合作嘅企業名單，消息突如其來，市場被殺個措手不及。　　　市場之所以意外，除咗因為拜登政府就嚟離任講「拜拜」，預計臨別唔會有乜嘢大動作之外，仲係因為兩家企業嘅營運並非敏感行業。尤其係寧德時代，大家都知道，佢係一個汽車電池製造商，亦係美國電動車龍頭特斯拉嘅供應商。雖然之前寧德時代計劃喺美國投資電池生產被拒，但仍然同福特汽車合作，喺密歇根州開設一家工廠，生產低成本磷酸鋰電池。同特斯拉亦有類似協議，將喺內華達州生產電池。一切睇落都唔似會突然被列入「黑名單」嘅企業，偏偏榜上有名。唔知道今次事件，會否打亂寧德時代同特斯拉嘅合作計劃？　　　值得細味嘅係，特斯拉創辦人馬斯克，正正係拜登嘅對手特朗普嘅鐵粉。特斯拉除咗同寧德時代喺內華達州合作生產電池，其上海工廠亦都選用寧德時代的電池，而家寧德時代被列入軍企關聯企業，相信特斯拉老闆馬斯克亦相當頭痕，如果寧德時代不在軍企名單上除名，雙方合作可能受到影響。一旦喺特朗普上台後除名，預料將喺特朗普政府扮演重要角色嘅馬斯克「瓜田李下」，難免被人聯想到同寧德時代嘅利益關係。　　　根據彭博資料，寧德時代目前係全球電動汽車電池第一大生產商。２０２４年寧德時代嘅市場佔有率約為３７％，遠遠?離其主要對手比亞迪（０１２１１）嘅１７％，呢兩家中國公司合 計佔據了全球電動汽車電池市場嘅半壁江山。　　　本來寧王（內地對寧德時代嘅暱稱）喺內地上市，睇落同港股好似無甚關連。但查實寧德時代喺１２月２７日已經宣布，準備喺香港主板上市，有望成為香港２０２５年ＩＰＯ重中之重。根據羅兵咸香港預測，喺多家大型Ａ股公司到香港上市集資嘅帶動下，２０２５年香港ＩＰＯ集資額估計達１３００至１６００億港元，有望重新躋身全球三甲之列。　　　據聞寧德時代計劃發行唔超過總股本５％的Ｈ股，集資金額至少５０億美元，大摩參考近期完成Ｈ股雙重上市嘅公司，平均較Ａ股股價折讓１０％至２０％，預計寧德時代香港ＩＰＯ集資額將達６８億至７７億美元（折合５２９億至５９８億港元），唔單只有望成為２０２５年港股集資王，而且將位列自１９８６年以來嘅十大新股集資王，同當年郵儲行（０１６５８）及鐵塔（００７８８）有得揮。寧王而家突然被列入涉軍企業名單，Ｈ股上市之路唔知會唔會受影響呢？　　　　順帶一提，寧德時代嘅崛起，帶動咗寧德市嘅新時代。寧德市本來只係福建省內一個唔起眼嘅小城，曾經因為經濟落後，喺福建省九個地級市包尾，名副其實嘅「臭老九」。同北面溫州，南邊福州，廈門同泉州等經濟發達城市相比，差距甚遠，更被戲稱為中國東南沿海嘅黃金斷裂層。話就話係沿海，其實境內絕大部分山嶺直逼入海，平地稀少，交通閉塞，發展一啲都唔容易。　　　只因呢度出咗兩個名人，造就咗寧德市脫胎換骨。一個係國家主席習近平，佢上世紀八十年代曾經喺寧德做地委書記。另一個係出生於寧德市嘅寧德時代創辦人曾毓群。寧德時代呢十幾年來喺當地大興土木，工廠遍地開花，帶動成個寧德市發展一日千里。呢個曾經落後嘅沿海小城，自２０２１年開始成功闖入中國經濟百強城市。所以寧德時代的崛起，牽動幾百萬人的生計，而家被列名軍企，究竟會係寧王飛速發展途中嘅小插曲，抑或係改變企業以至一座城市命運嘅重大事件？我哋拭目以待，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【etnet 30周年】多重慶祝活動一浪接一浪，好禮連環賞！ ► 即睇詳情