《小傳日記》今日講下近排鬧得沸沸揚揚嘅極越「爆煲」事件，作為汽車新勢力品牌極越汽車日前被曝員工大規模欠薪，部分線下門店已經無法營運，有自家主播甚至喺直播搵工。混亂過後，ＣＥＯ夏一平就發咗封內部信，話公司遇到困難，要即刻進入所謂嘅「創業２﹒０階段」，即系話要合併職能重複嘅部門同崗位，削減短期內賺唔到錢嘅項目添。　　　極越出身顯赫，背後嘅兩個大靠山就係百度（０９８８８）同吉利（００１７５），只不過極越銷情慘淡知名度欠奉，好多人都係因為佢財困先知道有極越呢個品牌。極越第一款車型極越０１喺２０２３年１０月正式上市，售價介乎２４﹒９９萬到３３﹒９９萬蚊之間。本嚟以為憑著高通驍龍８２９５晶片同埋雙Ｏｒｉｎ－Ｘ智駕晶片呢啲高科技配置，會好受歡迎嘅，點知事與願違，訂單量好慘淡，就算之後即刻變陣降價，都冇咩好反饋，極越喺２０２４年９月再推出嘅第二款車型極越０７，月均銷量唔夠１３００輛，喺當前嘅車市入面基本上就墊底，贏在起跑線都輸成咁，難怪會做咗棄子。　　　「互聯網公司Ｘ傳統車企」嘅造車模式喺神州大行其道，最成功當屬華為智選，而吉利作為車企龍頭、百度作為智能駕駛頭號玩家，強強聯手點解無法將打造好極越呢？極越管理團隊絕對責無旁貸啦。從夏一平嘅信函可以睇出，公司破產最重要是融資問題，據報百度有計劃注資３０億人仔嘅，但派財務團隊去做盡職調查後先發現，極越唔單止財務管理混亂，仲有高額負債，傳聞話有高達７０億嘅財務窟窿。好好地一間公司點解會做到一盤爛帳，好明顯係高管都覺得無論自己做得再差，兩大股東都會輸血，但今時唔同往日，新能源車藍海時代幾乎已經結束，對於股東嚟講，燒錢都要搵個好爐嚟燒，於是吉利同百度自然唔想再繼續投資。　　　至於極越仲有無前景呢？ＣＥＯ夏一平之前仲提出嘅「創業２﹒０階段」，四個措施全部都係關於節流，咁就弊啦，公司雖然出咗兩款車，但仍然處於起步階段，推廣自家新能源汽車需要大量營銷同埋穩健嘅銷售管道，成本要以天文數字計（問題係，之前燒嘅錢去晒邊呢？），再加上而家全國都知道你間公司進入破產邊緣，相當於打咗一次傳播極廣嘅負面廣告，有邊個車主希望自己架愛車變咗無咗售後支援嘅「孤兒車」？　　　只擅長整精美ＰｏｗｅｒＰｏｉｎｔ圈融資嘅投機者，企圖用互聯網思維經營汽車業，實在過於天真，而極越汽車並非個例。唔同於「互聯網＋」業務，一架新車由研發到推出再到銷售，樣樣都係學問，得把口可以堅持到幾時？當然啦，百度同吉利只顧投資，但係缺乏投後管理，結果到出事先嚟切割，一樣要檢討，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票