《小傳日記》本地地產市道唔好唔係第一日知，但新世界（０００１７）嘅重磅盈警都著實係嚇窒孖屐，乜原來真係有咁差。　　新世界預計截至６月底全年大蝕１９０億至２００億銀，但其實呢個數係包咗好多一次性因素，包括大量非現金重估以及出售事項確認虧損以至係撥備等等。雖然上述巨額虧損只不過係帳面上嘅，不過資產貶值相當於負債比率高咗，未來要借錢難咗，而且之後仲有無得派息都好難講。　　而單計持續經營業務，就仲可以錄得核心經營溢利介乎６５億至６９億銀，不過都係比２０２３年要少大約兩成，衰就一定衰硬，但究竟衰到咩程度就有得斟酌。　　新世界過去好一段都被睇淡，主要原因都係因為仍負債比率高過同行，就算呢幾年新世界一路想證明就算負債高，都可以用成績補救，但始終搞唔靚盤數，結果就係不斷捱沽。近呢幾年新世界二代話事人純官鄭家純都開始放手畀第三代，尤其新世界執行副主席兼ＣＥＯ鄭志剛，孖屐普遍認為已經等同已經等同欽定咗繼任人。而Ａｄｒｉａｎ揸旗開始，新世界風都開始唔同，旗下商場同商廈都變到香噴噴，而且設計感十足，變成新世界嘅嘜頭。但呢種新派設計就未能為新世界嘅業績出一分力，孖屐普遍認為呢種升級就係新世界盈利能力下降嘅一大主因。　　就係咁，純官都疑似開始有意唔想「單天保至尊」，雖然過去自己可以獨力撐起半邊天，但新一代四個仔女都疑似未有人可以一枝獨秀。所以新世界除咗發布盈警，鄭氏家族錢袋周大福企業就宣布成立行政總裁辦公室，成員包括純官孻仔鄭志亮，但就無包括Ａｄｒｉａｎ在內，市場普遍揣測係純官想捧埋孻仔上位，等四個仔女平分秋色，大家咁高咁大齊齊「猜皇帝」。　　大家咁高咁大，自然要各自爭表現。以往幾年新世界明顯由Ａｄｒｉａｎ主導，如今變陣之後明顯係各有各嘅發揮空間。雖然話係爭凳仔，但如今嘅新世界，確係需要一啲新動力，有得爭有碰撞就自然有火花，可能啲一點火花就係再次撻著新世界嘅火力。星星之火可以燎原，純官呢把火都點得相當令人期待，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

樂本健【雙11感謝祭】雙重優惠、多買多賞► 了解詳情