《魚缸博客》市道唔好各行各業都要爭餅食，前有電動車互毆，後有電商開片，行業競爭遍及各行各業。咁嘅環境下，真係唯有自強不息。噚晚小鵬（０９８６８）就舉行咗十周年大會，同時發布新車兼新晶片，正正係反映就算捱沽，都可以努力畀人睇。　　小鵬發布新系列Ｍｏｎａ第一架車款Ｍ０３，事前已經知係主打低價市場，所以新車外型係轎跑類型，符合返年青市場嘅眼光。何小鵬介紹，Ｍ０３花四年時間研發，投入４０億人幣，對標２０萬級車款；但標價都非常「年青市場」，三款車型最平嘅５１５長續航版只要１１﹒９８萬人仔，６２０超長續航版１２﹒９８萬人仔，５８０超長續航Ｍａｘ版１５﹒５８萬人仔，全系列都大大低於２０萬人仔，面對價格競爭絕對有優勢。　　何小鵬就豪言，未來十年中國汽車主流品牌或者只會剩低七間，「隨著ＡＩ大模型時代的到來，未來十年年銷１００萬輛將成為ＡＩ汽車決賽入場券」。佢仲提到，經過過去十年喺智能化上嘅堅持後，如今「小鵬汽車」已經正式升級為「小鵬ＡＩ汽車公司」，華麗轉身變成ＡＩ概念股。都難怪何小鵬咁風騷，噚晚除咗發布新車，仲宣布埋自研嘅圖靈晶片流片成功，話係全球第一粒可以同時應用喺ＡＩ汽車、ＡＩ機器人、飛行車上嘅ＡＩ晶片咁話。　　又新車又新晶片，係大餅定真好景，就起碼要睇Ｍ０３實際賣成點。但講得咁好聽，「市夢率」點都有啲提升，今朝計埋小鵬已經連升第三日，如果今日收穩現價水平附近就正式重上百天線，大市後市受炒減息支持，百天線有望守穩，短線後續再挑戰３５銀一啲都唔難。如果Ｍ０３賣得好，要破埋３５銀都大有機會！　《編者按》本欄搜羅即市傳聞，惟消息未經證實，《經濟通》亦不保證內容之準確性。

第九屆「傳媒轉型大獎」請投etnet經濟通一票！► 立即行動