政策市主導上落，可以推升幾千點，一個無料到嘅記者會又會冧返轉頭，消息面睇唔透，技術面更加睇唔透，好似今朝明明即市重牛位20500已經打穿，都仲要回馬槍殺穿多次20200。聽聞好多缸友都因為噚日盤冷水恢復返理智，就算後市可能未升完，都寧願要先cut loss。既然市況不饒人，咁揀股方面不如都回歸理智，睇返防守股公用股囉。
　　跌市必備大家都知，逢跌都總會見到電能(00006)、長建(01038)喺頂，算係避險佳品。走勢嚟睇，電能落到100天線大約48銀至48.5銀都會有一定支持，高位回落到而家都大約一成，現價都大約係唔錯入貨位，息率都有大約5.7厘，就算之後升市資金輪換，電能現價都唔會再有太大下跌空間。
　　另外長建走勢其實同電能差唔多，現價都可以開始吼返啲，但息率方面就唔及電能。但今日滙證都唱好長建，提到目前為止四宗收購將有望令公司提高派息，尤其出年3月大有機會增加末期息，將會刺激股價上升，目標價持68銀，所以現價入手都有望財息兼收。
　　至於博啲嘅話，今朝計落其實隻美團(03690)都可以留意吓，雖然同大市一齊跌過，但午休前回升竟然美團倒升返3%，科技股甚至重磅股之中升係幾強。走勢上暫時上返10天線，已經跑贏大市，如果係博後市仲有得升，美團就會係唔錯嘅跑贏大市之選！

《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】2026去邊最好玩？etnet為你提供全港最齊盛事活動，所有資訊盡在掌握！► 即睇