06/06/2024 10:16
《魚缸博客》平保收息之選要買趁早,短期目標47銀
《魚缸博客》今朝恒指高開152點或升0﹒8%,報18577,之後升幅持續擴大,最高曾見18700,暫時重上10天線(約18497),除非可以收高過18500,甚至重上20天線(約18825),否則,反彈隨時結束。 港股缺乏炒作主題,結果一係睇住美股表現跟下,再唔係就借個股業績、營運數據炒番轉,割完禾青就走頭。逐段睇的話,恒指兩萬點唔係咁易過,現時企喺18000至19000中間位,上下500點可以玩好耐。 依家都係買吓高息股好過,今日講吓隻中國平安(02318)。自2004年上市以嚟,不論外面打風落雨,平保都從未試過唔派息,仲試過十送十添。最新末期息派1﹒5銀人仔,但聽日就除淨,要收息就要今日買喇。以平保人民幣櫃台報價約每股38﹒1銀人仔,息率接近4厘,如果大家有揸人仔,人民幣櫃台正好方便投資者唔使換番港幣再買股票,多個選擇都係好事。 平保去年度保費收入雖然增加2%,至5364﹒4億人仔,但股東應佔溢利減少0﹒8%,至856﹒65億人仔,雖然賺少咗,但都係賺,現時周息率6﹒5厘,預測周息率就有6﹒7厘,好過做定期。 走勢上,平保同恒指相似,但技術形態比恒指差,以港元報價,股價喺5月30日跌穿20天線(現約41﹒81)後,連續5日反彈都上唔番條20天線,成個下降旗形咁,我擔心短期會急跌,下試50天線(37﹒05),即係潛在跌幅3﹒6銀,扣埋股息都要蝕2蚊,但以中長線計,預測市盈率只係大約5﹒5倍,40銀仍算偏低,如果打算作為長期收息,分兩注買就夠。我就建議現價40﹒25銀落一注先,跌落去就喺38﹒1銀落第二注,除非發生重大不利事件,否則,唔穿29銀都唔止蝕,首目標望住47銀先,再升就望60銀。(pc) 《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】巴黎奧運正式閉幕,今屆你感到最深刻的地方是?► 立即投票