《魚缸博客》近日微盟（０２０１３）炒高，最大消息就係微信團隊公告稱，微信小店正式開啟「送禮物」功能的灰度測試，除珠寶、教育培訓類目，且商品款式原價不得高於１萬元人仔的商品將默認支持「送禮物」功能。　　　簡單來講，而家流行微信「派紅包」，所以再進一步可以「送禮物」，我預計都係朋友圈╱小程式見到有間鋪，上網買完，直接Ｆｏｒｗａｒｄ俾個屋企人微信，屋企人點「接受」，入好地址就可以收貨。　　　其實呢樣東西唔係話唔好，而係有幾大「實際用途」，老老實實去到２０２４年，長輩派利市都係用利市封入好俾後輩，呢個係傳統問題，微信紅包未見得取代到。同樣原理，送禮係中國人傳統，中秋會送、新年會送，重點係將利用實物維繫人與人之間關係，而家咁樣「網上」送禮，又幾顯示到誠意呢？　　　再延伸落去，中國人送禮同請客文化係多數綑綁埋一齊，要將咁樣文化「剝離」，其實難度相當大。所以如果手機ＳａａＳ要用咁樣去炒高，博客覺得唔太睇好，如果有貨人士建議有賺就食，無貨如果又想炒，而家兩棍陽燭，相信幾日內會有回吐，都可以考慮買少少，但博客覺得利潤不會多餘２０％，風險自行考慮。　《編者按》本欄搜羅即市傳聞，惟消息未經證實，《經濟通》亦不保證內容之準確性。

【etnet 30周年】多重慶祝活動一浪接一浪，好禮連環賞！ ► 即睇詳情