03/06/2024 11:54
《魚缸博客》新能源車銷量升幅咁強,營收同盈利增長有無咁強?
《魚缸博客》恒指今日扭轉上周後期的劣勢,暫時升緊超過400點。一眾新能源車股走勢更是凌厲,比亞迪(01211)、理想(02015)、蔚來(09866)、吉利(00175)、長城汽車(02333)升幅都在4%至6%之間。今日新能源車股大升,除咗跟隨大勢向上之外,亦因為多家車企公布了5月份唔錯嘅銷售數據,按年增幅都超過兩成。其中蔚來表現最標青,5月交付新車超過2萬架,按年升超過2﹒3倍,難怪股價升咁多。 不過,市場或者過度聚焦於銷售數據,而忽略咗銷售金額嘅重要性。又難怪嘅,今次公布嘅只有銷售量,並無公布銷售金額同汽車單價。記得蔚來5月中發布嘅第二品牌樂道,首款車型樂道L60預售價為21﹒99萬元人民幣起,較原本動輒30、40萬元人民幣嘅價格大幅降低。同樣地,一向主打20萬元人民幣以上車型嘅小鵬汽車(09868),早前亦宣布,新品牌MONA,會進軍10萬至15萬元人民幣汽車市場。至於理想以及小米(01810),早前所推出嘅SUV新車亦大力搶攻20幾萬元人民幣嘅汽車市場。自4月以來,已有超40家車企、共128個車系,進行降價或優惠調整。可以話,未來嘅新能源車市場沒有最激烈,只有更激烈。所以,呢刻公布嘅汽車銷售量對於各車企業績嘅助力有幾大,仍然係未知之數。千萬唔好將銷量增幅當係營收增幅呀,更唔好對盈利能力有過分憧憬。 為咗搶佔市場,各大車企出盡法寶谷銷量,除咗直接減價之外,傳聞有車企為咗搶客,針對已付定金嘅小米SU7準車主推出5000人仔補貼。政府方面,無論是商務部定係地方政府同樣不遺餘力,商務部連同地方政府推出舊車換新車補貼計劃,得到地方政府例如武漢,蘇州等地相應,紛紛推出補貼措施。可想而知,新能源車的競爭激烈程度。 雖然新能源車成交量目前仍然處於上升周期,但上升幅度能否維持目前的水平係一個疑問。外銷方面,由於美國早前已經宣布加徵新能源車進口關稅,歐盟亦已經啟動對中國進口新能源車補貼調查,預料新能源車未來的外銷市場可能或受到影響。一旦出口有阻滯,原本用來出口嘅數量難免改為內銷,進一步加劇本來已經競爭激烈嘅內銷市場。所以,新能源車市場未來仍然充滿變數,相關車股都係短炒穩陣啲,有錢賺梗係袋落袋安全啲啦。(vs) 《編者按》本欄搜羅即市傳聞,惟消息未經證實,《經濟通》亦不保證內容之準確性。
【慎防受騙】偽冒《經濟通》投資群組頻現,切勿誤信騙徙,如有疑問,請循官方渠道查詢► 了解詳情