《魚缸博客》魚缸臨近半年結，但市況都係相對淡靜，陸家嘴論壇之後都無乜消息，魚缸已經連續兩日唔夠千億銀成交，睇怕今個半年結都係１８０００附近淡收。　　不過跌市之下，近呢兩日食品股反而表現勇猛，好似隻旺旺（００１５１）咁，宣布豪派３﹒３美仙末期息，「息誘」投資者果然成功令股價連飆第三日，今日半日就升差唔多一成。不過食品股有今日主要都因為過於價殘，呢幾個月神州物價指數都無乜好表現，令到食品股等不斷被ｄｏｗｎｇｒａｄｅ，至今反彈都唔排除係技術性，趁半年結前平一平倉。　　不過，就算係反彈都算係有勢，敢炒都係會有些少執到。睇睇啤酒股，呢一季以來成績都係慘淡，主要受累茅台等白酒價格下跌，連啤酒股都跌跌不休。百威（０１８７６）上半日升４％左右，現價啱啱升過２０天線，如果下晝９﹒３銀成功守得著，中短線可以博上１１銀，即大約１００天線位置。　　另外，潤啤（００２９１）之前都跌咗唔少，現價都係徘徊喺２７至２８銀，已經返到落去２月所造低位，現價都可以小注博佢炒上３１銀！　《編者按》本欄搜羅即市傳聞，惟消息未經證實，《經濟通》亦不保證內容之準確性。

夏日中暑高風險！即睇中暑迷思＋預防措施！► 立即了解