《小傳日記》一減完息港股就即刻生猛返，繼噚日１４００億成交之外，今日又有１７００億，打勻返成個禮拜平均每日都過千億成交，總算有啲交代。估唔藥明系都戥魚缸高興，尾市急升一成贈慶。　　呢幾年嘅經驗都知，藥明系但凡大幅異動，九成機會都係因為《生物安全法案》有料到。的而且確真係有，今日下晝神州有炒股大Ｖ指出，美國參議院軍事委員會最新發布嘅《國防授權法》修正案入面，總共納入修正案９３個，但就無編號２１６６嘅《生物安全法案》。消息認定《生物安全法案》要經《國防授權法》快速通過立法「已經徹底流產」、「已經徹底堵死」。另外消息又話就連國土安全事務委員會９月２５日議程入面都無《生物安全法案》，所以單獨立法都可能喺參議院小組委員會流產。　　又「流產」又「堵死」，消息寫到《生物安全法案》好似已經死無葬身之地咁，但係藥明系係咪從此飲得杯落？有關藥明系同《生物安全法案》嘅消息，經常滿天飛，尤其之前都試過連人數多咗少咗都可以炒，與其話美國有意搞藥明，倒不如話有炒家加鹽加醋，一兩滴油都炒得出一鑊飯。　　唔好唔記得，《生物安全法案》喺眾議院係由兩黨合力以３０６票對８１票通過，上到參院係咪就風向大變？雖然消息提到「流產」，但以目前消息嚟睇，用「難產」可能會比較為適合，即係唔係生唔出，只不過係有啲阻滯。其實消息都只係話無咗「快速通過立法」嘅機會，而且只係暫時未上到參議院議程，並唔代表之後唔會拎出嚟再傾。　　不過消息有一點係啱，就係其實美國兩黨並唔急於訂立《生物安全法案》，因為呢個法案牽涉範圍太大，就連時下最ｈｉｔ嘅減肥神藥都離唔開藥明康德嘅供應，加上生物安全又唔係咩十萬火急、重中之重嘅議題，由佢慢慢煲都得。所以美國運用立法打擊藥明康德嘅奧妙就係「磨爛蓆」，等到美國藥企主動搵到Ｐｌａｎ　Ｂ，喺供應鏈層面逐步取代藥明康德，之後再落閘都未遲。而從孖屐角度嚟睇，法案太快通過就好似炒飯無咗隻鏟咁，無論係美國定炒家都好需要呢隻鏟，總之有排玩，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

想要獨家投資理財Tips？即Like etnet 全新Facebook專頁► 立即讚好