《小傳日記》緊張刺激嘅一星期終於過去，除咗美國大選同美聯儲局減息塵埃落定之外，新鮮滾熱辣，阿爺終於肯講大家最期待嘅銀碼，宣布增加地方政府債務限額６萬億人民幣，用於置換存量隱性債務。數係出咗，但同預期嘅１０萬億都係差咁啲，隨後未收市嘅期指即刻跌多３００幾點，點都有啲失望。　　　你有你失望，但地方政府多咗呢６萬億人仔用嚟填氹點都叫係鬆動咗，我個氹填咁啲又理得你個氹係點。之前都提過地方政府近期明顯係鬆動咗，多返啲投資意欲，仲「好有眼光」咁揀正車股嚟增資。到今日就有回報喇，小鵬（０９８６８）今日真係變身「大鵬」，展翅高飛一成半，最高仲見過６０銀。　　　「大鵬」噚日就正式公布Ｐ７＋售價，最低１８﹒６８萬人仔，比之前預售價再低咗２﹒３萬人仔，即時引起市場轟動，加入減價戰，人捲你又捲。據報頂爛市價錢即刻吸引買家落單，１２分鐘已經完成過萬張大訂，據小鵬官方提到，Ｐ７＋出價後，官方ｓｅｒｖｅｒ直頭差啲冧咁滯，比起之前ＭＯＮＡ上市嗰陣流量再多咗廿倍，足以證明呢架新車火爆程度。　　　就咁睇Ｐ７＋外型的確係型仔一啲，而且配置上都升級唔少，稱得上「秀外慧中」，而且Ｐ７＋仲要ｓｅｌｌ自家智能駕駛系統鷹眼智駕，食埋ＡＩ概念添。何小鵬介紹，過去嘅豪華係配置豪華，而家就係科技豪華，Ｐ７＋標配圖靈ＡＩ高階智駕，全系相同兼不分Ｍａｘ版和Ｐｒｏ版。　　　Ｐ７＋橫空出世，有人就問起何總係咪有意同小米（０１８１０）旗下ＳＵ７一較高低呢？何總就畢恭畢敬咁提到，Ｐ７＋並唔志在同ＳＵ７競爭，兩者方向唔同，都係「友軍」，更特別提到「雷軍是大哥」，態度同當日雷軍震撼發布ＳＵ７嗰陣一樣，講就客氣啫，但削肉減價就一啲面都唔俾，電動車進入存量博弈時代，如果出海唔成功，留喺國內總有一日要鬥餐死，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

第九屆「傳媒轉型大獎」請投etnet經濟通一票！ ► 立即行動