《魚缸博客》美國大選、議息結果都陸續出爐，剩低最關鍵就係人大常委會後有乜嘢宣布，市傳今日下晝開完會有大事發生，比起「Ｔｒｕｍｐ　ｔｒａｄｅ」嚟講，博客認為人在魚缸，梗係炒返「保５　ｔｒａｄｅ」！　　市傳人大常委等美國大選結果出爐後就會公布救市措施，呢個禮拜入面雖然仲算係觀望氣氛，恒指周內仲係困喺２００００至２１０００區間之間，但中後期開始明顯風險胃納有所提升，指數雖然有上有落，但２１０００都已經有想破嘅動力，個別最有望係政策受惠嘅板塊，呢幾日都有熱錢炒作，不排除春江鴨已經趁呢一星期整裝待發，消息一出就可以起行。　　市場預期今次救市焦點在於特別國債，如果真係如外界所講，資金規模達到１０萬億，對孖屐短線走勢而言毫無疑問係特大利好；而除咗銀碼之外，市場都諗緊有無可能會提及全力發展創科嘅方針出現，主要就係由呢個星期熱炒嘅創科概念反向推測返嚟，所以「１０萬億」、「人工智能」、「創新科技」都有可能係今次憧憬政策嘅重要關鍵詞。　　近期車股大旺，擺脫年初嘅減價戰陰霾，電動車龍頭明顯已經從中發展出更強優勢，比亞迪（０１２１１）、蔚來（０９８６６）、小鵬（０９８６８）甚至小米（０１８１０）都先後發布令人興奮嘅月銷數據，就知新能源車大戰仍然有得打。乘著呢股車業風潮，市場明顯對汽車下游相關服務股份投放意欲提升，汽車代理、租賃以及車貸等等股份都好有鑊氣，趁今日回落，係時候跟炒一轉。　　半新股汽車街（０２４４３）上個月疑似出現烏龍盤，造價１１７﹒１銀都有成交，日內當然即刻回落，但１０月下半月都有炒味上過４０銀以上水平，隨後雖然回落至現價大約２０銀左右，但都未跌穿５月上市價１０﹒２銀，表現尚算強勢，如果憧憬車業好景帶旺下游生態，汽車街作為二手車買賣平台算係幾好炒嘅相關概念股。不過要知道炒味濃當然風險唔細，注碼要控制得精準，現價２０銀附近不妨作第一注，有機會落１７銀可落第二注，短線上望３５銀都夠和味，跌穿１４銀就要止蝕！　《編者按》本欄搜羅即市傳聞，惟消息未經證實，《經濟通》亦不保證內容之準確性。

【與拍賣官看藝術】東南亞藝術市場是下一個熱點？一探各地獨特及吸引之處！► 即睇