《小傳日記》近年新世界（０００１７）股價不斷尋底，最大嘅問題就係債台高築。到２０２４年６月底嘅財年，新世界嘅總負債率高達４９﹒５％，仲出現２０年嚟首次虧損。持續經營業務嘅收入同比下降咗３４％，得返３５８億港元，核心經營溢利亦減少咗１８％，變成６９億港元。究竟新世界係咪病入膏肓？　　其實呢，新世界嘅問題都唔可以完全怪鄭志剛，始終時運不濟都有啲影響。地產商負債高，呢啲本來就係常事。但偏偏美國聯儲局喺２０２２年開始加息，搞到大興土木之後啲資金回唔到籠。為咗減債，新世界都狠心沽貨，希望可以解決債務危機，但結果都係無濟於事。　　喺９月２６號，新世界發展公布２０２４財年業績嗰時，鄭志剛正式宣布辭任行政總裁，改由新世界首席營運總監、前發展局局長馬紹祥接任。新世界作為鄭氏家族最有代表性嘅企業，攞嚟畀「外姓人」接掌，真係令外界跌曬眼鏡。不過，先前鄭家純都講過，未必一定要家族內部人接班，「如果冇合適嘅家族成員，可以向外招聘。」　　佢仲公開講接班人要才德兼備，對生意有興趣，對家族生意有熱誠，仲要有領導才能，做到大公無私。除咗才，鄭家純仲強調德行更重要，因為佢希望家族生意可以一直傳承落去，冇私心，擁有好嘅品德，先至可以照顧其他家族成員。　　問題係，邊個係鄭家純心目中嘅才德兼備接班人呢？除咗鄭志剛，鄭家純同老婆葉美卿仲有兩子一女。長女鄭志雯早就管理緊瑰麗酒店集團，仲執掌周大福珠寶（０１９２９）。次子鄭志明今年年初升任新創建（００６５９）聯席ＣＥＯ；三子鄭志亮今年９月就入局周企，做聯席ＣＥＯ。將來由邊個來揸大旗言之尚早。　　而家新世界先由「外姓人」執掌未嘗不可，畢竟發達國家一直都做緊呢樣嘢，至於鄭氏家族是否如坊間傳聞引發豪門鬥爭，對我哋小股民嚟講唔重要，最多當係八卦新聞聽。講到底，小股民最關心嘅係接班人可唔可以將集團盤數做好，股價有得升。希望新舵手可以帶領公司走出困境，令股民重拾信心！請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

第九屆「傳媒轉型大獎」請投etnet經濟通一票！► 立即行動