18/06/2024 16:57
《小傳日記》小米新摺機又主打鏡頭,唔夠AI會唔會無人吼?
《小傳日記》魚缸成交日日縮,今日仲縮到得900億多啲,據聞孖屐係睇緊聽日上海陸家嘴論壇會唔會出現咩猛料,即管睇吓聽日夠唔夠1000億銀囉。 魚缸之前升完一輪又歸於平淡,科指重磅嘅小米(01810),自從SU7炒作期完結過後,小米股價都回歸平淡,不過近期都企得住17銀做整固,某程度都反映孖屐肯定SU7嘅賺錢實力。不過睇得車多,差啲都唔記得小米係造電話;上個月就有傳小米將會喺今年第三季出新機,會係兩款摺機,分別係MIX Fold 4同旗下第一款直向摺機MIX Flip。 小米手機持續搞高端化,並唔會好似以前咁甘心做「平替」,而係對標對手嘅競爭者,有報道吹風講到,兩部新機都用到高通驍龍8 Gen 3,5000萬像素主攝鏡頭,6400萬像素人像鏡頭;而MIX Fold 4更配備一個1200萬像素超廣角鏡頭同1000萬像素的5倍光學變焦長鏡。就咁睇吹風料,兩部摺機都同旗艦機款一樣想用鏡頭做主打。 不過如今AI橫行,目前大家對手機市場焦點都係iPhone內置ChatGPT,AI手機先係萬眾期待嘅焦點,如果小米新機AI元素不足,話唔定未必可以好似SU7咁受歡迎。不過小米新機都唔係完全無期待點,畢竟而家小米手上有架熱賣電動車,如果可以畀孖屐睇多啲新機可以點樣同車艙系統互動,先會提升到「米粉」對於小米後市嘅追捧力度。 暫時魚缸都未算好給力,小米14銀穩唔穩都係要睇大市,如果魚缸牛熊線不保,係咁咩股都可能仲有下望空間,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【慎防受騙】偽冒《經濟通》投資群組頻現,切勿誤信騙徙,如有疑問,請循官方渠道查詢► 了解詳情