《小傳日記》今日有消息放出，蘋果公司上周啟動咗代號為「Ａｔｌａｓ」嘅智能眼鏡研究計劃，想進軍智能眼鏡領域。呢單消息一出，蘋概股全線應聲上揚，高偉電子（０１４１５）破頂高見２７銀，最大升幅１５％；舜宇光學（０２３８２）最大升幅１５﹒６５％，高見５６﹒９銀。　　如果消息屬實，今次將會係Ｖｉｓｉｏｎ　Ｐｒｏ滑鐵盧後，蘋果第二次向面部穿戴設備發起進攻。今年２月，蘋果推出首款ＶＲ頭戴裝置Ｖｉｓｉｏｎ　Ｐｒｏ，賣到３４９９美元，約兩萬七銀。唔單止定價高，用家體驗更係一言難盡。Ｖｉｓｉｏｎ　Ｐｒｏ嘅重量大概係１斤２兩左右，相當於綁咗一個中等大小嘅哈密瓜喺頭上，只要戴耐少少，用家就會頸痛、頭痛、顴骨痛，而且Ｖｉｓｉｏｎ　Ｐｒｏ仲有３Ｄ眩暈、續航時間短、殺手級應用數量不足等問題，認真伏過直升機。　　蘋果從今年初夏開始，大幅縮減Ｖｉｓｉｏｎ　Ｐｒｏ嘅生產量，甚至可能喺年底前完全停產呢個版本。搞出呢壇嘢後，蘋果都積極研究點樣減輕設備重量同提升佩戴舒適度，智能眼鏡呢種相對輕便嘅設備就係佢哋搵到嘅突破點。　　不過智能眼鏡概念實在唔算創新，講真可以話有啲復古，事關有關賽道已經高手雲集：Ｍｅｔａ、Ｇｏｏｇｌｅ、微軟、ＯｐｅｎＡＩ等ＡＩ領域嘅領先公司，都嘗試緊將ＡＩ技術融入智慧眼鏡同其他可穿戴設備之中。Ｆａｃｅｂｏｏｋ母公司Ｍｅｔａ與雷朋（Ｒａｙ－Ｂａｎ）合作嘅智能眼?，賣２９９美元，話係ＡＩ領域最暢銷嘅硬件產品之一，預計今年出貨 量超過２００萬副。佢哋聲稱呢款眼鏡可以影相、計算食物卡路里、識別植物、翻譯等，至於Ｇｏｏｇｌｅ嘅ＡＩ模型Ｇｅｍｉｎｉ，專注喺智能眼鏡嘅搜索服務；而微軟喺眼球追踪技術方面攞咗專利，主打互動體驗。　　雖然競爭激烈，但蘋果有其獨特優勢。佢哋有多項智能眼鏡相關專利，仲收購咗好多ＡＲ╱ＶＲ技術公司，技術基礎穩陣。Ｖｉｓｉｏｎ　Ｐｒｏ本身亦都有可圈可點嘅地方，例如個「空間計算」體驗，令你感覺置身於數字同現實混合嘅世界，沉浸感爆棚。而且手眼追蹤技術都被稱讚又流暢又準，操作簡單方便。　　咁多款眼鏡要揀邊款，要問筆者意見，就當然係邊款唔醜戴邊款，因為有時科技宅嘅審美真係不敢恭維，就算幾好用，醜到戴唔到出街，都好難講有咩應用空間，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【與拍賣官看藝術】東南亞藝術市場是下一個熱點？一探各地獨特及吸引之處！► 即睇