03/07/2024 16:31
《小傳日記》李寧又放風,真假難辨不如落實先再捧!
《小傳日記》李寧(02331)喺過去一年跌跌不休,由上年最高80銀到年底只係得返20銀左右,唔見大約七成半。到今年奧運年,諗住個價可以有返啲起色,點知呢半個月又有尋底跡象,望見都有啲心酸。 不過今日下晝又有料傳出,話李寧本人正考慮增持,以便對未來戰略有更多控制權,目前正係諗緊各種選項,可能會引入私募股權之類,為佢嘅增持行作交易融資。因應李寧本人目前係透過非凡領越(00933)持有大約10﹒5%嘅李寧股份,所以大有可能會通過非凡領越嚟增持李寧。 李寧股價過去呢年半走勢非常之頹廢,最大原因都係經濟前景唔好帶來嘅消費降級,拖累整體消費意欲。同安踏(02020)一樣,庫存過高一路都困擾緊佢哋呢類大品牌。過去呢段時間,孖屐都睇唔到李寧有咩嶄新嘅方法去解決存量問題,所以期間股價就算有反彈,之後都難免要跌返落嚟。 其實李寧想引入私募股權已經唔係新鮮事,今年3月放榜前已經傳過一次,當時就傳李寧本人計劃提私有化,因為自己持股唔多所以會侵埋例如高瓴之類嘅私募一齊玩。業績會上被問到係咪想私有化,就回答話作為投資人,「任何可以提高投資者回報嘅方案都會考慮」,包括派息同「其他方式」,更加瀟灑咁話「股價的事情不是我的責任」。 時隔差唔多四個月再次放風,李寧股價今日都由跌轉升,成交額都比噚日多接近七成。記得上次傳私有化嗰次李寧急升兩成,今次比起上次升勢就蚊髀同牛髀,某程度反映孖屐已經無乜反應。所謂「一鼓作氣,再而衰,三而竭」,今次第二次放風作用明顯唔及上次,記得上次孖屐中人都話,如果真係私有化就直接做,邊會放到咁多風出嚟。今次都一樣,傳聞只係話「考慮」增持,最終增唔增持都未知,不如增咗先再講啦,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】巴黎奧運正式閉幕,今屆你感到最深刻的地方是?► 立即投票