《開市Ｇｏｏｄ　Ｍｏｒｎｉｎｇ》神州連日出招救市，包括暫停新增轉融通證券出借、嚴懲操縱惡意沽空、中央匯金亦擴大增持交易型開放式指數基金（ＥＴＦ）等，惟神州股市基本因素弱及孖屐信心仍不足，要轉勢言之尚早？香江魚缸炒上主要受Ａ股刺激，周二（６日）報復式反彈超６００點後，今日跌５４點收市，雖失守５０天線（１６２６９點），但萬六關能守得住，屬周二急彈後正常回調？　　阿里巴巴（０９９８８）收市後將公布１２月底止第三財季業績，彭博綜合孖屐預測，平均料季度營收有２６１７億人仔，按年增５﹒６巴仙，經調整純利逾４７８億，按年跌近半成。另外亦關注旗下淘天集團或受宏觀經濟及結構調整拖累收入放慢，及國際數字商業（ＡＩＤＣ）增長情況，以及可否保持回購。阿里今日曾經升至７７銀，惟單日回調失７５關，業績若然唔對板，後市隨時「見光死」？　　聯想（００９９２）股價過去十日急插兩成三，主要因市場憂慮聯想被花旗國制裁風險升溫，加上花旗國芯片巨擘英特爾（Ｉｎｔｅｌ）本季收入預測遜市場預期，反映市場對花旗國制裁敏感，戒心仍大？即使今年ＡＩ　ＰＣ有望驅動換機潮，但利好因素未必即刻反映於第一季芯片需求上？　　聽日（８日）《開市Ｇｏｏｄ　Ｍｏｒｎｉｎｇ》搵嚟國農證券董事總經理林家亨，同大家分析上述股份、大市走勢，當然唔少得當日嘅焦點股！歡迎大家提問投資及其他股票問題。記得準時８：５５ａｍ，昅實《經濟通》ＮｅｗｓＴＶ直播節目－－《開市Ｇｏｏｄ　Ｍｏｒｎｉｎｇ》喇！或者ｃｌｉｃｋ入嚟ｈｔｔｐｓ：╱╱ｗｗｗ﹒ｙｏｕｔｕｂｅ﹒ｃｏｍ╱ｗａｔｃｈ？ｖ＝ｙ０ｌｅＺＺ２ＶＷＤＩ打個卡先又得！

【香港好去處】etnet全新頻道盛大推出！全港最齊盛事活動資訊盡在掌握！► 即睇