09/09/2024 17:15
《小傳日記》茶百道攻港對決蜜雪?除咗做靚盤數都要做靚間舖!
《小傳日記》市道唔好各行各業都要內捲,茶飲股內捲都唔係第一日,甚至連香江呢個唔話得上潛力好強嘅市場都要捲一捲。茶百道(02555)進軍魚缸四個幾月,終於都要正式進軍香江餐飲市場。 唔同幾年前喜茶攻港,當年喜茶最大對手都係得奈雪(02150),如今難聽啲真係阿豬阿狗都攻港,大大細細聽過未聽過都開舖。而茶百道威就威在係第二隻上市嘅茶飲股,比蜜雪冰城遲來先上岸,而且新舖選址都擺明正面迎擊蜜雪,就喺蜜雪銀行中心分店行過大約唔到200米距離嘅西洋菜南街30號地舖,只係大約一個街口。 當日蜜雪租起銀行中心地舖做第一間香港分店,盛惠廿萬月租,當日大家就同佢計過數,要每個月賣兩萬二千杯檸水先等於舖租。而家茶百道新舖一樣對標蜜雪,同樣廿萬月租,不過茶百道定位高大上些少,應該唔使月賣兩萬杯先夠交租。 好似美團(03690)一樣,孖屐一般認為過江龍落嚟香港都係為出海鋪路,但實情香港分店並唔係茶百道內地以外第一間分店,反而早喺今年1月茶百道已經喺韓國打響海外第一炮。茶百道喺韓國定位係高價行列,定價每杯折合大約33銀港紙。起初幫襯主要都係神州留學生多,但據《界面新聞》引述當地負責人提到,三個月內就可以達成本地客八成以上。截至7月韓國總共四間門市,全部四間都已經回曬本賺緊錢,難怪目前韓國係茶百道最多海外分店嘅國家,其餘仲有泰國兩間以及澳洲兩間。 香港客群唔夠多,過江龍如果實力唔夠厚都好難企得著腳,連美團都要掟足十億落嚟先可以企得穩,茶百道為此都唔輸蝕,重本廿萬租舖。咁大家又唔好以為茶百道嚟香港開分店好似有咩鴻圖大計,其實本質都係同蜜雪一樣,係間樣辦舖,用嚟曬冷畀孖屐睇,開張第一日睇怕又要打個蛇餅,上曬新聞。 餐飲零售行業想像空間比其他行業窄得多,最大優勢係夠入屋,所以形象工程相當重要,早排老鋪黃金(06181)掛牌嗰陣,有孖屐中人就嫌中環嗰間分店人流唔夠,於是就將隻股睇淡一線,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
WoW WoW星期三:2024最後一擊! (只限今天)► 火速行動