17/06/2024 16:59
《小傳日記》大家樂勁賺多兩倍!但市道全面恢復仲要再等一會?
《小傳日記》魚缸周末返嚟繼續18000攻防戰,但長時間嘅消耗戰難免令缸友意興闌珊,今日大市成交總額係自5月28號以來第一日唔夠千億,整體走勢真係頹頹哋。不過晏晝隻大家樂(00341)就逆市興奮,皆因全年度大賺多兩倍! 今日晏晝大家放晏期間大家樂放榜,截至今年3月底全年純利按年大增1﹒99倍至3﹒3億銀,收入按年升8﹒3%至86﹒91億銀。大家樂更加提到,如果撇除政府嘅疫情資助,實際上純利按年係勁升4﹒8倍。雖然大賺消息早喺5月初已經有盈喜預先透露,但今次連埋派息一齊公布,末期息派42仙,按年再增五成,全份業績完全係「有升有息」。 以業務劃分收入,大家樂集團旗下「大家樂」同一粥麵係歸類為「速食餐飲」,而其餘米線陣、上海姥姥、The Spaghetti House同Oliver's Super Sandwiches就歸類為「休閒餐飲」。全年度速食餐飲收入51﹒38億銀,按年升6﹒9%;休閒餐飲收入就係8﹒79億銀,按年升2﹒5%;至於包含泛亞飲食同活力午餐在內嘅機構飲食收入就按年升18%至10﹒20億銀。以分類嚟睇,平價版嘅快餐增長比起中價版嘅「休閒餐飲」增長仲多,反映過去一年度市民使錢多咗,但都講究著唔著數。 其實過去一年有唔少本地餐飲成績都唔錯,好似太興(06811)截至2023年12月底全年度純利接近9400萬銀,而2022年度就係純損4300萬銀多啲,全年度轉虧為盈之餘仲要賺咁多,都證明市民消費習慣都係以日常消費為主。因此,奢侈品方面代表,周大福(01929)截至今年3月全年度純利只係多賺大約兩成,升幅明顯唔夠日常消費類別咁勁。 錢往低處流,市況雖然叫復甦,但都未復甦到高端類別之中,睇嚟唔只係神州,連本地都係身陷消費降級之中,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇