《楠楠自語》最近再次聽到有人指外國半導體追求更高製程技術是浪費產能浪費資源，聲稱先進製程損耗率高。筆者認為必須正視聽。　　　問：７ｎｍ夠用啦！點解要開發５ｎｍ、３ｎｍ？　　　答：簡單做個比喻，幾乎同期推出，麒麟９０００Ｓ（中芯國際７ｎｍ）同驍龍８＋　Ｇｅｎ　１（台積電４ｎｍ）比較，淨係跑分計，效能都差幾乎５０％。　　　問：粒ＣＰＵ咁快對我嚟講都無用，我部手機打出打入、睇片ＷｈａｔｓＡｐｐ就夠啦！　　　答：對你嚟講無用，不代表對世界無用。起一個Ｄａｔａ　Ｃｅｎｔｅｒ效能相差５０％的話，試想需要耗費多少資源才能夠補足？你可以用Ｗｉｎｄｏｗｓ　９５，但港交所個ｓｅｒｖｅｒ唔可以。　　　問：將來會唔會有其他科技超車英偉達（ＮＶＤＡ）台積電（ＴＳＭ）？咁佢哋會唔會見頂？將來會唔會被其他科技彎道超車？　　　答：絕對會！假設硅晶圓已經達到物理極限，需要用新材料繼續推進半導體進程的話，依家大家見到最有可能性嘅應該係石墨烯或常溫超導體。但目前兩樣嘢都仍然喺實驗室階段，就算成功研發，成本太高都無辦法量產。能夠量產係民用嘅最大基礎。另外，咁大間半導體公司，你覺得佢哋會唔會有研發團隊開發新材料新技術？當年美國造出原子彈，蘇聯都係遲４年啫，唔好一廂情願覺得人哋係傻嘅。科技七雄不停燒錢投放資產開支研發半導體、增加數據中心，難道我哋比黃仁勳、Ｔｉｍ　Ｃｏｏｋ、Ｊｅｆｆ　Ｂｅｚｏｓ聰明？憑甚麼人哋係上市公司主席，我哋係老散？就算你聰明，都唔好以為人哋係傻嘅。　　　問：咁外國玩晒啦！一句講晒，你依家撐唔撐中國半導體先？　　　答：撐！但細佬窮，無咁多錢同國家一齊燒。目前至可見將來，以台灣（省╱地區）為首嘅晶圓代工體系難以被打破。受惠中國政府投資半導體嘅公司，都非常明顯唔會係中芯國際（００９８１）。　　　問：中芯有技術但唔公布畀你睇啫！　　　答：作為一家上市公司，如果有新技術但投資者不知道，就已經是隱瞞資訊，對投資者唔住。上市公司為的是替投資者謀取利潤最大化，不是為國家研發，然後獲取一丁點利潤。再者，有嘅，為何唔攞出嚟？下游產業被美國封鎖咁耐，捱到死吓死吓，你有技術唔攞出嚟？所以大概率中芯國際技術仍然被拋離好一段距離，甚至車尾燈都未見到。　　　認清事實，投資看的不是情懷，而是錢。有回報有收益的公司，才是該投資的標的。《南華金融集團副總監　莫灝楠》　＊《經濟通》所刊的署名及╱或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇