《魚缸博客》呢兩日阿爺又吹風話救市，博客第一反應就係：睇定少少先。博客早嗰排係恒指升兩三千點嗰排就轉咗ＭＰＦ去港股，點知內地一復市復工就跌成三四千點，博客個ＭＰＦ都輸成兩三萬，拿拿聲都係轉返美股先算。　　　仲記得早兩個月大升市個陣，個個後生仔都話要開戶借錢炒股，點知阿爺一出聲話要「曼牛」，年輕人立即變成「年輕韭菜」，真係喊都無謂；所以呢次又話「救市」，都唔知係咪狼來了，要散戶再入市都幾難下。　　　其實有幾個關鍵位決定恒指仲有無力上，第一就係美國減息問題，而家減減下就話暫停，市場都無水，升條毛咩；其次，港股目前缺乏一啲「真正高科技」股份，呢個係美股點解會比港股優勝嘅地方，所謂「高科技」，好似Ｔｅｓｌａ搞太空旅行、Ｎｖｉｄｉａ搞ＡＩ晶片，發展係未來十幾年嘅事。　　　而反看恒指成分股，多數都係地產股、銀行股、消費股、石油股為主，最高科技都係阿里巴巴（０９９８８）、京東（０９６１８）同百度（０９８８８），但都係做網購或者雲業務，都係已經相當成熟行業，大行無得「炒未來」推高估值，所以恒指炒來炒去都係兩萬點上落。　　　對於呢次升市，博客都係認為審慎為主，可以先繼續觀望一下，畢竟近日升到２１０００又被人打返落，證明樓上仲有好多人要走貨，等佢地換多兩手先講啦！　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票