《小傳日記》上周五（２２日）恒指季檢公布快手（０１０２４）被納入恒指成分股，今日一開市快手就高開逾２％，盤中高見４６﹒７銀，全日收市仍升４﹒５％，係表現最佳國指成分股。　　　快手之所以可以躋身恒生指數成分股，梗係有其過人之處喇。快手上季嘅業績表現真係好亮眼：總營收同比增長１１﹒４％，去到３１１億元人仔咁多，經調整淨利潤同比增長２４﹒４％，達到３９億人仔。快手Ａｐｐ用戶規模再創新高，平均日活躍用戶同比增長５﹒４％達４﹒０８億；快手電商業務方面好似唔起眼，但喺上年其實已經加入萬億ＧＭＶ俱樂部，而上季ＧＭＶ同比再增長１５﹒１％至３３４２億人仔；廣告收入方面，快手線上行銷服務收入同比增長２０％達１７６億人仔。　　　不過，今日快手都有一條壞消息傳出。國家網路安全通報中心通報話，快手存在對不良資訊處置唔及時，青少年模式落實唔到位嘅情況，導致違法資訊擴散，危害未成年人身心健康，被內地公安當局行政處罰。有內媒引述消息指，快手受罰主要同未成年人不良「擦邊」內容有關。　　　神州短視頻生態因為「接地氣」，深受三四線城市網民喜愛，而快手又比抖音更進一步挖掘基層市場，所以神州年輕人往往將快手打上「土味」、低俗嘅標籤。就好似快手捧出嘅兩位網紅咁，「郭老師」被指引發「審醜式追星」而遭內地當局封殺，而辛巴就因為帶貨期間虛假宣傳翻車，快手就似短視頻界嘅拼多多，底層文化野蠻生長係快手嘅制勝法寶，但當為咗迎合基層群眾而任由「不良風俗」滋長，自然會有監管大棒伺候。　　　快手最近興起嘅「慢腳文化」，從「出圈」到「清朗」，就同以前嘅種種「互聯網亂象」發展過程如出一轍，相信神州同胞都十分熟悉。慢腳慢腳，慢對應快，腳對應手，既對應到快手，又可以帶出短視頻年代嘅「抽象」文化，本來係指其特有嘅誇張、搞怪、非主流行徑，但最終語義被演變成賣弄軟色情嘅惡俗風氣。　　　最常見嘅擦邊內容，就係未成年女仔著校服配絲襪自拍，雖然著裝本身唔係過分暴露，但通過著裝反差嚟營造一種「擦邊」嘅氣氛，引人遐想，仲有未成年人低價出售「私密照」，喺網上同啲陌生人進行挑逗性互動，真係好窒息。另一種喺快手盛行嘅短視頻，就係「爭當全網最小媽媽」，真係唔知咩腦迴路，甚至出現「歡迎收看０６年女孩二胎坐月子」等聳人聽聞嘅內容，爭先展示自己未成年結婚生子嘅生活吸引流量，冇諗到喺呢個大家都選擇唔結婚、唔生孩子嘅年代，快手上面嘅未成年扛起生育率嘅大旗，真係令人大開眼界。　　　除此之外，仲有大量青春疼痛文學，比如話為情所困就要割腕自殘，女孩瞓喺小溪扮「水母」配上「青春疼痛文學」嘅文案。唔單止危險，仲傳播埋啲唔健康嘅價值觀。呢啲內容嚴重影響咗青少年嘅健康成長，傳播嘅價值觀都好有問題。　　　眾所周知內地互聯網平台公司要掏出一大筆錢做內容審核，以符合當局要求，點解快手咁大一間公司就偏偏管唔住出晒圈嘅「慢腳文化」？一來呢類「擦邊」影片的確未有明目張膽展示性內容，二來平台算法本就鼓勵用戶做流量動物，有人通過博眼球嘅內容來留住男粉絲，快手當然都係受益者。唔少海外社交平台嘅經驗話俾我哋知，色情內容係增加用戶黏性嘅利器，尤其係神州嚴格禁黃嘅背景之下，呢類「很黃很暴力」嘅影片必然吸引唔少觀眾，而且快手雖然坐擁４﹒０８億日活量，但比一哥抖音仍然差咗近乎五成，要獨闢蹊徑吸引流量，難免對「擦邊」內容格外包容，不過「接地氣」唔等於「接地府」，呢類嚴重惡俗嘅影片，絕對唔適合喺無年齡分級嘅平台上分享，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

想要獨家投資理財Tips？即Like etnet 全新Facebook專頁► 立即讚好